Sonymen qatar bul sheshim Shymkent qalasynyń mamandandyrylǵan aýdanaralyq ákimshilik soty otyrysynyń qorytyndysy boıynsha shyǵaryldy, 10 jumys kúni ishinde zańdy kúshine enedi. Osy kezeńde akademık A.Qýatbekov atyndaǵy Halyqtar dostyǵy ýnıversıteti sot sheshimine de, mınıstrlikke de shaǵymdanýǵa quqyly.
Buǵan deıin kezekti josparly tekserý barysynda anyqtalǵan buzýshylyqtardy zańnamada belgilengen merzimde túzetý úshin JOO-ǵa birneshe ret múmkindik berilgen bolatyn. Oryn alǵan buzýshylyqtar oqý úderisin uıymdastyrý, talapkerlerdi oqýǵa qabyldaý, JOO-ny oqý-ádistemelik jáne ǵylymı ádebıettermen qamtamasyz etý, túlekterdi jumysqa ornalastyrý tóńireginde boldy. Máselen, "Atameken" QR UKP reıtınginiń derekteri boıynsha joǵary oqý ornynyń bilim berý baǵdarlamalary jumys berýshilerdiń 17,4%-ǵa ǵana kóńilderinen shyqty. Al bilim berý baǵdarlamalarynyń 82,6%-y boıyrsha pysyqtaý jumystary talap etiledi, óıtkeni jumys berýshilerdiń talaptaryna sáıkes kelmeıdi.
"Biz stýdentter men ata-analardyń mundaı sharalar, eń aldymen, stýdentterdiń ózderiniń múddelerin eskere otyryp, qabyldanatynyn túsingenin qalaımyz. Eger joǵary oqý oryndary bilim berý salasyndaǵy talaptarǵa sáıkes kelmese, dıplom alǵannan keıin bolashaq mamandar jumysqa ornalasý problemalaryna tap bolýy múmkin. Akademık A.Qýatbekov atyndaǵy Halyqtar dostyǵy ýnıversıtetine qatysty sheshim shamamen aıdyń sońynda zańdy kúshine enedi. Árıne, prosess sozylyp ketýi múmkin. Biz óz tarapymyzdan stýdentterge basqa joǵary oqý oryndaryna aýysýǵa kómektesemiz. Bul ýnıversıtette tek 50 adam grant boıynsha oqıdy, ol stýdentter óz granttaryn saqtap qalady. Aqyly negizde oqıtyndar úshin oqý quny burynǵy deńgeıde qalady. Stýdentter memlekettik joǵary oqý oryndaryna aýysa alady. Stýdentterdiń barlyq oqý kórsetkishteri basqa JOO-larǵa aýysqan kezde jaramdy bolady. Shymkentte bul JOO-nyń bilim alýshylaryn qabyldaı alatyn joǵary oqý oryndary jetkilikti ekenin atap ótkim keledi. Stýdentter óz mamandyqtary boıynsha oqýyn jalǵastyra alady. Sondaı-aq jaqyn ornalasqan qalalarda 50-ge jýyq ýnıversıtet bar. Biz osy joǵary oqý orny ınfraqurylymynyń bazasynda mektep nemese kolledj ashýdy usyndyq. Sebebi qazirgi tańda bir bilim alýshyǵa 500 myń teńgege jýyq memlekettik tapsyrys alý múmkindigi bar", dep atap ótti BǴM Bilim jáne ǵylym salasynda sapany qamtamasyz etý Komıtetiniń tóraıymy Gúlzat Kóbenova.
Joǵary oqý ornynyń stýdentteri myna mamandyqtar boıynsha aqyly túrde oqıdy: "Pedagogıka jáne bastaýysh oqytý ádistemesi", "Esep jáne aýdıt", "Qarjy", "Quqyqtaný" jáne t.b. Oqý quny – 275 myńnan 800 myń teńgege deıin. Stýdentter oqý semestriniń aıaqtalǵanyn kútpeı-aq basqa joo-larǵa aýysa alatynyn aıta ketken jón.
