Nur-Sultan kóshelerindegi art-óner galereıasy qazaqstandyq jáne sheteldik sýretshilerdiń týyndylaryna baı. Qaladaǵy erekshe mýraldarǵa elorda ákimdiginiń resmı saıty anyqtap, sholý jasaǵan edi.
"Ǵarysh ortasy" mýraly. Osy jazda elordadaǵy Qabanbaı batyr dańǵylynda Dóńgelek alańnyń kópir bóliginde paıda boldy. Jumbaq ǵalam, zerttelmegen planetalar men ǵaryshtyq deneler bul jerge erekshe atmosfera syılaıdy.
Qazaqtyń uly aqyny Abaı Qunanbaevtyń portreti Abaı dańǵylynda ornalasqan kópqabatty úıdiń sánin keltirdi. Bul jumys aqynnyń 175 jyldyǵyna oraı Baıqońyr ákimdiginiń qoldaýymen salyndy.
Koronavırýspen kúreste aldyńǵy shepte júrgen medısına qyzmetkerlerine arnalǵan "Biz birgemiz" mýraly. Kompozısııa Saryarqa jáne Jangeldın kósheleriniń qıylysynda ornalasqan turǵyn úıdiń qasbetinde beınelengen.
Elordadaǵy turǵyn úılerdiń birinde oryndalǵan "Illıýstrasııa" keıipkerler galereıasyn sýretshi Aleksandra Kalacheva 2018 jyly Urban Fest Astana aıasynda beınelegen. Qasbetke salynǵan sýretterde qala turǵyndarynyń kúndelikti ómiri beınelengen.
Ázirbaıjandyq sýretshi Samır Salahovtyń "Daladaǵy tús” strıt-artynda (Moldaǵulova kóshesindegi úıde) barys pen aqbóken beınelengen.
Esenberlın kóshesindegi úıde ornalasqan Zmogk-tyń "Tarıh" mýraly. Bul mýraldyń jarqyn tústeri kóz tartady. Sýrette tarıhı oqıǵalardy qaǵazǵa túsirip otyrǵan qyz beınelengen.
Evgenıı Ches-tiń "Tabıǵat taqyrybyndaǵy kollajy" beton úıler, shyny ǵımarattarmen astasqan qalalyq kóriniske tabıǵat motıvterin aralastyrady.
