Nur Otan-da oblys ortalyqtary máslıhattarynyń tizimine qatysty jeke sheshim qabyldandy

Buǵan deıin partııa músheleri oblys ortalyqtarynan shyqqan reıtıngi joǵary praımerız kandıdattarynyń bir bóligi oblystyq jáne qalalyq máslıhattarǵa depýtattyq mandat ala almaı, rezervte qalýy múmkin degen alańdaýshylyqtaryn bildirgen edi.

Sondyqtan Ortalyq uıymdastyrý komıtetiniń hattamasy negizinde jáne Praımerızdi ótkizý erejesine sáıkes óńirlik fılıaldar oblys ortalyǵy bolyp tabylatyn qalalardyń partııalyq tizimderin qalyptastyrý tártibi týraly jeke sheshim qabyldady.

"Tizimder praımerız qorytyndysy boıynsha saılanatyn kandıdattar men partııalyq kvotadan jasalady. Oblystyq máslıhattyń partııalyq tizimindegi basym úlesti aýdandar jáne basqa qalalarmen salystyrǵanda saılaýshylar sanynyń kóp bolýyna baılanysty oblys ortalyǵy bolyp tabylatyn qalalardyń kandıdattary quraıdy. Tizimge eń joǵary reıtıngke ıe kandıdattar engiziledi", - dedi partııanyń baspasóz qyzmeti.

Osy oraıda kandıdat máslıhat nemese Májilis deńgeıin tańdaýǵa quqyly ekeni aıtyldy. Oblystyq máslıhat jáne Parlament Májilisi depýtattyǵyna kandıdat retinde usynylýdan bas tartqan jaǵdaıda úmitker pikirsaıysqa qatysýshylar tiziminen shyǵarylady jáne onyń ornyna jańa úmitker qosylmaıdy. Bul rette osy kandıdat mindetti túrde qalalyq partııalyq tizimge engiziledi.

Oblys ortalyqtarynyń partııalyq konferensııalaryndaǵy pikirsaıystarǵa qatysýshylardyń tizimi oblystyq partııalyq tizimge qalanyń ókildik etý kvotasynda 1 orynǵa 2 kandıdat esebinen jasalady.

Pikirsaıystar men daýys berý qorytyndylary boıynsha eń joǵary daýys jınaǵan qatysýshylardyń 50%-y oblystyq partııalyq tizimge engizý úshin usynylady. Onyń ishinde, pikirsaıys qorytyndysy boıynsha eń kóp daýys jınaǵan kandıdattar Májilistiń partııalyq tiziminde óńirdiń ókildik etý kvotasyna sáıkes Májilistiń partııalyq tizimine pikirsaıysqa qatysýshylar retinde oblystyq konferensııaǵa usynylady.

"Qalalyq partııalyq konferensııadaǵy pikirsaıystardan keıin debattan bas tartqandardan, pikirsaıystarda utylǵandardan jáne partııalyq kvotadan (máslıhattaǵy mandattar sanynyń 30%-y) qalalyq partııalyq tizim bekitiledi. Bul rette partııalyq tizimde 30% – áıelderge, 20% – 35 jasqa deıingi jastarǵa arnalǵan kvota saqtalýy tıis", - dep tolyqtyrdy baspasóz qyzmeti.

Esterińizge sala keteıik, buǵan deıin "Nur Otan" partııasy óńirlik konferensııalar kestesin jarııalaǵan bolatyn. Onyń barysynda barlyq deńgeıdegi máslıhattarǵa partııalyq tizimder, sondaı-aq ár óńirden Májiliske partııalyq tizimge kandıdattar anyqtalatyn bolady.