Atalǵan ortalyqtyń jetekshisi Andreı Matveev tálimbaqtaǵy kóshetterdi ósirýge balalardyń belsendi túrde atsalysyp júrgenin maqtanyshpen aıtady.
– Balalar tuqym jınaý men olardy otyrǵyzýdan bastap ósirilgen kóshetterdi kútýge deıingi aralyqtaǵy jumystardyń bárin óz qoldarymen, zor yntamen isteıdi, – deıdi ol.
Ortalyqtaǵy tálimbaqta aǵashtyń ádemi sánaǵash (katalpa), kıiz pavlovnııa jáne qarapaıym órik syndy úsh túri ósiriledi. Bul ósimdikter Jezqazǵan óńiriniń klımattyq erekshelikteri eskerilip tańdalǵan. Bıyldyń ózinde qalada otyrǵyzylǵan 500 kóshettiń 90%-dan astamy tamyr alyp, jersinip ketken eken.
Tálimbaqtaǵy jumys mynadaı úderis boıynsha uıymdastyrylady: kóktemde barlyq kóshet jylyjaıda otyrǵyzylady. Tamshylatyp sýarý, gıdrogel, vermıkompost syndy tásilder sýarýǵa qajet sýdyń mólsherin únemdep qana qoımaı, ósimdikterdiń ósýi men damýyn edáýir jyldamdatady. Eger qalypty jaǵdaıda katalpa kóshetterin ósirýge 2-3 jyl ýaqyt ketse, munda 9 aıdan 1,5 jylǵa deıin, al pavlovnııa aǵashyn jarty jyldan keıin otyrǵyza berýge bolady.
Búgingi tańda tálimbaqtyń kólemin keńeıtý boıynsha jumystar qolǵa alynǵan. Birgemiz: Taza alem jobasynyń shaǵyn grantynyń arqasynda balalar men jasóspirimder saraıynda taǵy 220 sharshy metr qurǵaq topyraq tamshylatyp sýarý tásilimen qamtamasyz etilmek. Budan bólek qaladaǵy №26 gımnazııanyń bazasynda qosymsha alań paıda bolady.
Aldaǵy ýaqytta Jezqazǵannyń shap-shaǵyn «jeruıyǵyna» aınalǵan tálimbaqta ósimdik túrleri kóbeıtilip, emen, qaıyń, arsha sııaqty aǵash kóshetteri ósirilmekshi. Mamandar ózderi aınalysyp júrgen berekeli istiń Jezqazǵandy ǵana emes, basqa da óńirlerdi jasyl jelekke bóleý jobasyna ıgi áserin tıgizetinine bek senimdi.
Qaraǵandy oblysy,
Jezqazǵan qalasy
