Aǵash ósirýdiń besjyldyq jobasy iske assa, 2025 jyldyń kókteminde óńirdegi ár eldi mekennniń janynda 1200 gektar toǵaı jaıqalyp turýy tıis. Osylaısha, oblystaǵy otyz jyl burynǵy orman alqabyn qalypqa keltirý úshin naqty qadamdar jasala bastady.
О́ńirde jasyl jelek beldeýin qalyptastyrý jobasynyń barlyq tarmaǵy "Aqtóbe oblysynda orman sharýashylyǵyn damytýdyń 2021-2023 jyldarǵa arnalǵan is-sharalar josparyna" kirip, osy jyldyń basynda Aýyl sharýashylyǵy mınıstrliginde maquldandy.
Aqtóbe oblysy aýmaǵynda jasyl jelek beldeýin qalyptastyrý josparynyń negizgi baǵytttary – jyl saıyn arnaýly tálimbaqtarda 7,5 mıllıon túp kóshet otyrǵyzý jáne osy óskinderdi taratý, orman alqabyn jylma-jyl 1077 gektarǵa ulǵaıtý, dala órtterimen kúres.
Sońǵy jyldary oblystyń 12 aýdanynda josparly túrde jasyl beldeý qurý sharalary múlde júrgizilmedi. Buryn ózen saǵalarynda ósken toǵaı aýmaǵy keńeıtilip, jeti aýdandaǵy orman sharýashylyǵy mekemeleri aǵashtardy kútip-baptaýmen aınalysyp kelse, 25 jyldan beri osy toǵaılar qaraýsyz qaldy.
Bul úrdisti tek shalqar aýdany ǵana umytqan joq. Jeri shóleıt osy aýdanda qumnyń kóshýin toqtatý maqsatynda jyl saıyn 5 gektar jerge tobylǵy men jyńǵyl, sekseýil otyrǵyzylady. Biraq shólde ósetin butalardyń ári qaraıǵy jersinýi, olardy kútip-baptaýǵa qatysty tolyq baqylaý joq. Bul aǵashtar qum ishinde ósip jatyr ma, álde qýrap qaldy ma, suraýy joq bolyp tur. Sondaı-aq Hromtaý aýdany da kógaldandyrý jumystaryn bıyl ǵana qolǵa alyp, Hromtaý qalasynyń irgesinde 5 gektar alqapqa jergilikti klımatqa tózimdi aǵash-terekter egip, jaz boıy kútip-baptady.
Orman alqabyn saqtaý, toǵaılardaǵy eski aǵashtardyń ornyna jańa kóshetter otyrǵyzý, olardy órtten qorǵaý boıynsha qazirgi ýaqytta eshkim jaýap bermeıdi. Osyǵan deıin aty bar da, zaty joq mekemelerge aınalǵan orman sharýashylyǵy mekemeleri tek bıyl esep bere bastady.
Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasy jasyl aımaq qurý jumystaryn báskelestik ortaǵa berýge yqylasty. Endigi jerde aýdandardaǵy jeti orman mekemesi aǵash ósiretin jerdi aldyn ala daıyndaý, mekemelerdi jas óskindermen qamtamasyz etýmen aınalysady. Dalalyqta otyrǵyzylǵan aǵash kóshetterine de osy arnaýly mekemeniń mamandary kútim jasaıtyn bolady.
