Brıfıng barysynda Oljas Bektenovten medısınalyq saqtandyrý qorynyń burynǵy basshysy Aıbatyr Jumaǵulovqa qatysty tergeý isiniń mán-jaıy suraldy.
"Áleýmettik medısınalyq saqtandyrý qorynyń qyzmeti boıynsha bizde sybaılas jemqorlyq táýekelderine syrtqy taldaý júrgiziledi. Bul tekserý emes, bıznes-prosesterdi taldaý. Qylmystyq-quqyqtyq aspektige sáıkes Qordyń burynǵy basshysyna qatysty búgingi kúni esh shaǵym joq. Taldaý qorytyndylary boıynsha MÁSQ jumysynyń tıimdiligin arttyrýǵa múmkindik beretin usynymdar daıyndalady", dedi Oljas Bektenov.
Eske sala keteıik, aǵymdaǵy jyldyń shilde aıynda qazaqstandyqtar Aıbatyr Jumaǵulovtyń jubaıy jarııalaǵan pikirge qatysty jelide narazylyqtar týyndap, sońy daýǵa aınaldy. Atalǵan jaıttan keıin Memleket basshysy qordyń burynǵy basshysyn ornynan túsirýdi buıyrdy. Dál sol aıda Sybaılas jemqorlyqqa qarsy qyzmet agenttigi Qordyń qarajatyn urlaý faktileri boıynsha sotqa deıingi tergeýdi bastaǵanyn málimdedi.
