Qazaqstandyqtar bul matchqa mynadaı quramda shyqty: Pokatılov, Marochkın, Logvınenko, Álip, Vorogovskıı, Taǵybergen, Ábiken, Dosmaǵambetov, Qýat, Shetkın jáne Aıymbetov.
Lıtvanyń namysyn myna oıynshylar qorǵady: Shvedkaýskas, Vaıtkýnas, Gırdvaınıs, Beneta, Mıkolıýnas, Vorobev, Shımkýs, Sırgedas, Slıvka, Novıkovas jáne Laýkjemıs.
Alǵashqy jarty saǵatta qos komandanyń oıynshylary alma-kezek shabýyldar uıymdastyrǵanymen, kógildir ekranǵa kóz tikken kórermender eleń ete qalatyndaı esh nárse bolǵan joq. Qaqpaǵa soqqy baǵyttaý bylaı tursyn, tipten aıyp alańynda bolǵan asa bir qaýipti sátti kóre almadyq. Áıteýir, birde Qazaqstannyń, birde Lıtvanyń fýtbolshylary aram ter bolyp, árli-berli júgirip júrdi. Oıynnyń 38-mınýtynda alań ıeleri buryshtama berý múmkindigine ıe boldy. Qaqpa mańyna baǵyttalǵan dopqa Egıdııýs Vaıtkýnas pen Abat Aıymbetov qatar sekirdi. Sál shapshańdaý qımyldaǵan qandasymyz qorǵaýshynyń aldyn orap ketti. Abattyń baspen soqqan doby qaqpa torynan tabyldy. Qazaqstan alǵa shyqty – 1:0.
Shyny kerek, Abat Aıymbetovtiń ádemi de áserli golyna qýantyp ta úlgermedik. Arada eki mınýt ótpeı jatyp, tarazy basy teńesti. Bul rette Egıdııýs Vaıtkýnastyń eńbegi eren. Sonyń aldynda ǵana óreskel qatelik jibergen qorǵaýshy sol qaptalmen janushyra alǵa umtyldy. Aıyp alańyna jaqyndaǵan tusta Modest Vorobevqa jaqsy pas berdi. Ol óz múmkindigin qalt jibermedi – 1:1.
Ekinshi kezeń bastalǵan bette ekinshi ret sary qaǵaz alǵan Islambek Qýat alańnan qýyldy. Alańda bir oıynshysy kem bolsa da, qazaqstandyqtar qarsylastaryna tizgindi bermedi. Baltyq jaǵalaýynan kelgen jigitter de jaǵdaıdy shıelenistirýge asyqpady. О́ıtkeni, teń oıyn olardy qanaǵattandyrady. Osylaısha, oıyn bir saryndy órbip jatty. Qos komanda da osy esepke keliskendeı áserde boldyq. Alaıda negizgi ýaqytqa tóreshi qosqan tórt mınýttyń sońǵy sekýndttarynda qonaqtar tarazy basyn teńselip ketti. Dál aıyp alańyndaǵy syzyqshanyń qasyna kelgen bette Arvıdas Novıkovastyń shirene tepken doby nysanaǵa dál tıdi – 1:2.
Sóıtip, Qazaqstan ulttyq qurama komandasy aıtýly jarystyń S dıvızıonyndaǵy 4 tobynda eń sońǵy orynda qalyp qoıdy. Bizdiń fýtbolshylar nebary tórt upaıdy qanaǵat tutty. Kósh basynda – Albanııa (11 upaı). Ekinshi jáne úshinshi oryndardy Belarýs (10 upaı) pen Lıtva (8 upaı) ıelendi.
