Qalalyq ákimshilik polısııa qyzmetkerleriniń málimetterine sáıkes saptyq bólinister jol qozǵalysy erejelerin óreskel buzýshylardy anyqtaý boıynsha jumysty kúsheıtti.
– Osy kúnderi qalada reıdter ótkizilýde. Patrýldik polısııa men mamandandyrylǵan batalonnyń jeke quramy jalǵan nómirlik belgilermen júrgen, memlekettik tirkeý nómirleri joq, terezelerin qarańǵylaǵan, sondaı-aq kólikterdi zańsyz qaıta jabdyqtaǵandardy ustaýǵa baǵdarlandy. Sonymen qatar kólik quraldaryn alkogoldik mas kúıinde basqarý faktilerine erekshe nazar aýdarylýda. Júrgizýshilerdiń arasynda jol qozǵalysyna qatysýshylardyń ómiri men densaýlyǵyna qaýip tóndiretinder áli de azaıar emes, – dedi Almaty qalalyq Polısııa departamenti bastyǵynyń birinshi orynbasary Nurlan Almasbekov.
Polısııa qyzmetkerleri tek ótken táýlikte ǵana qala joldarynda mas kúıinde kólik júrgizgen bes júrgizýshiniń ustalǵandyǵyn, olardyń ekeýiniń osyǵan deıin kólik basqarý quqyǵynan aıyrylǵanymen, mas kúıinde kólik tizginine qaıta otyrǵanyn atap ótti. Taǵy bir júrgizýshi jalǵan nómirlik belgi qoldanǵany úshin jaýapqa tartyldy.
Sonymen qatar ótken táýlikte avtokólik terezelerin qarańǵylaýdyń 18 faktisi, avtokólik quraldaryn qujatsyz júrgizýdiń 23 faktisi, apattyq jaǵdaı týyndatýdyń 4 faktisi, qarsy jolaqqa shyǵyp ketýdiń 2 faktisi jáne t.b. quqyq buzýshylyqtar anyqtalǵan.
