Zań jobasy qazaqstandyq dıplomattardyń áleýmettik qorǵalýyn nyǵaıtýǵa jáne dıplomatııalyq qyzmet organdarynyń qyzmetin jetildirýge baǵyttalǵan.
«Zańǵa kelesideı ózgerister men tolyqtyrýlar engizý kózdelgen, ıaǵnı dıplomatııalyq qyzmet ardagerleriniń áleýmettik qorǵalýyn jetildirý maqsatynda Zańda «Qazaqstan Respýblıkasy dıplomatııalyq qyzmetiniń ardageri» uǵymyn bekitý usynylady. Bul sanatqa zeınetkerlik jasqa tolǵan jáne keminde 25 jyl jalpy eńbek ótili bar, onyń ishinde Qazaqstan Respýblıkasynyń dıplomatııalyq qyzmet organdarynda 15 jyl jumys istegen adamdar jatqyzylatyn bolady», dep túsindirdi Syrtqy ister mınıstri Muhtar Tileýberdi.
Onyń aıtýynsha, Tótenshe jáne О́kiletti Elshi, halyqaralyq uıymdar janyndaǵy Turaqty (ókiletti) ókil qyzmetin atqarǵan nemese Tótenshe jáne О́kiletti Elshi dıplomatııalyq dárejesi bar dıplomatııalyq qyzmet ardagerlerine Qazaqstan Respýblıkasynyń Úkimeti aıqyndaıtyn tártippen jáne mólsherde aı saıyn aqshalaı tólem tólenetin bolady. Qajetti shyǵyndardy Respýblıkalyq bıýdjet komıssııasy bıylǵy 11 tamyzda qoldady.
«Álemdik saıasat pen ekonomıka salasynda irgeli jáne ǵylymı-qoldanbaly zertteýler júrgizý maqsatynda dıplomatııalyq qyzmet organdary júıesine ǵylymı mekemelerdi kirgizý usynylady. Bul Syrtqy ister mınıstrligine qaraıtyn Syrtqy saıası zertteýler ınstıtýtynyń mártebesin arttyryp, onyń qyzmetiniń negizgi baǵyttaryn bekitýge múmkindik beredi», dedi mınıstr.
