Atyraý oblysy boıynsha Qylmystyq-atqarý júıesi departamenti baspasóz qyzmetiniń aqparatyna súıensek, jazasyn óteýshilerdiń arasynda buryn memlekettik qyzmette bolǵan sheneýnikter de bar.
«Qoǵamdyq jumysqa tartý túrindegi jaza sottyń úkimimen jergilikti atqarý organdary bekitilgen nysandarda júzege asyrylady. Bizdiń maqsatymyz – sottalǵandardy qoǵamdyq jumysqa tartý arqyly tárbıelep, qaıtadan qylmysqa jol bermeý. О́ıtkeni, qoǵamdyq jumystyń tárbıelik máni tıimdiligin dáleldedi. Jazasyn óteýshi azamattar ekinshi ret shalys baspaýǵa tyrysady» deıdi Atyraý oblysy boıynsha Qylmystyq-atqarý júıesi departamentiniń bastyǵy Manarbek Ǵabdýllın.
Departament bastyǵynyń málimetinshe, jaýapqa tartylǵandar kúnine 4-ten 8 saǵatqa deıin jumys isteıdi. Olarǵa eńbekaqy tólenbeıdi. Jazaǵa tartylǵandardyń kópshiligi – esirtkini paıdalanǵandar, mas kúıinde kólik júrgizgender, urlyq jasaǵandar. Qazir probasııa qyzmetiniń esebinde 1200 sottalýshy tur.
