Biryńǵaı jınaqtaýshy zeınetaqy qorynyń habarlaýynsha, kelisimniń negizgi maqsaty – eńbekshilerdiń zeınetaqy quqyqtaryn jumysqa ornalasqan memlekettiń azamattary sııaqty jaǵdaılarda qalyptastyrý, saqtaý jáne iske asyrý.Kelisimge sáıkes eńbekshiler bolyp EAEO-ǵa múshe basqa memlekettiń aýmaǵynda eńbek nemese ózge de qyzmetti júzege asyrý arqyly zeınetaqy quqyqtary qalyptastyrylatyn ne qalyptastyrylǵan Qazaqstan, Reseı Federasııasy, Qyrǵyzstan, Armenııa jáne Belarýs elderiniń azamattary esepteledi.
Kelisim aıasynda odaqtyń bir elinen ekinshi eline zeınetaqyny eksporttaý tártibi men tetigiaıqyndap, zeınetaqy alý quqyǵyn anyqtaý úshin EAEO memleketterindegi jumys ótilin jınaqtaýkózdeledi.
«Eńbekshini medısınalyq kýálandyrý, onyń ishinde múgedektigi boıynsha zeınetaqy taǵaıyndaý barysynda syrttaı medısınalyq kýálandyrý máselesi retteldi. Sondaı-aq, kelisim kúshine engenge deıin jáne odan keıingi jumys kezeńderi úshin zeınetaqy taǵaıyndaý men tóleý tártibin aıqyndaıtyn ótpeli erejeler bekitildi. EAEO-ǵa múshe árbir memlekettiń eńbek etýshige zeınetaqynyń jumys kezeńinde jáne jumysqa ornalasqan eldegi zeınetaqy jarnalarynyń aýdarymdaryna barabar bóligin tóleıtinin eskere otyryp, 01.01.2021j. bastap eńbekshiler EAEO-ǵa múshe memleketterde jumys berýshilermen eńbek qatynastaryn resmı rásimdeýleri, ıaǵnı mindetti túrde eńbek nemese azamattyq-quqyqtyq sharttardy ýaqytyly jasasýlary qajet» delingen BJZQ habarlamasynda.
Bul rette kelisimge sáıkes jınaqtaýshy zeınetaqyny, sondaı-aq, múgedektigi boıynsha jáne asyraýshysynan aırylý jaǵdaıy boıynsha eńbek (saqtandyrý) zeınetaqylaryn qospaǵanda, zeınetaqy alý quqyǵy eńbekkerdiń múshe memlekettiń aýmaǵynda jınaǵan keminde tolyq 12 aı jumys ótili bolǵan kezde (Kelisim kúshine engennen keıin), sol memlekettiń zańnamasyna sáıkes tólenedi.
Qazaqstanda bul kelisimdi júzege asyratyn quziretti organ – BJZQ. Iаǵnı, azamattar túrli suraqtar boıynsha osy organǵa júgine alady.
