Agenttiktiń ótken jylǵy atqarǵan jumystarynyń qorytyndylary shyǵarylyp, aldaǵy kezeńdegi mindetteri men olardy iske asyrý josparlary talqylanǵan alqa otyrysynda baıandama jasaǵan Anar Jaıylǵanova sapalyq quramnyń artyp, merıtokratııa qaǵıdatyn saqtaý jáne kadr turaqtylyǵy kórsetkishteriniń jaqsarǵanyn atap ótti.
Ol sondaı-aq 7,5 myń memlekettik qyzmetshiniń mansaptyq ilgerileýge qol jetkizgenin habarlady. Bul barlyq konkýrs boıynsha taǵaıyndalǵandardyń jalpy sanynyń 60 paıyzyn quraıdy.
О́tken jyly agenttik saıası memlekettik qyzmetti kásibılendirý maqsatynda alǵash ret «Jańa formasııa basshysy» baǵdarlamasyn engizgen bolatyn. Sıngapýrdyń Lı Kýan Iý Memlekettik saıasat mektebi men Memlekettik basqarý akademııasy jáne Nazarbaev Ýnıversıteti birlesip iske asyrǵan bul jobanyń basty maqsaty – saıası qyzmetshilerdi zaman talabyna saı oqytý.
О́tken jyly osy baǵdarlamaǵa 50 saıası qyzmetshi qatyssa, bıyl taǵy 50-in oqytý josparlanyp otyr. «Jahandyq kózqaras», «Tıimdi kommýnıkasııalar» jáne «Transformasııalyq kóshbasshylyq» boıynsha otandyq jáne sheteldik bıznes-trenerler men koýchterden biliktilikterin arttyrǵandardyń deni – vıse-mınıstrler, ákimderdiń orynbasarlary, Prezıdent Ákimshiligi bólimderiniń basshylary, sondaı-aq Prezıdenttik kadr rezervinde turǵan jastar.
«Sondaı-aq basshylardyń basqarýshylyq tájirıbesin tıimdi paıdalaný maqsatynda Memleket basshysynyń 2020 jylǵy 13 qarashadaǵy Jarlyǵymen saıası qyzmetshilerdiń rotasııasy engizildi. Saıası qyzmetshiler taǵaıyndalǵan kúnnen bastap ár tórt jyl saıyn rotasııadan ótedi. 2021 jyly 67 saıası qyzmetshi rotasııaǵa jatady», dedi agenttik tóraǵasy.
Alqaly jıynda jekelegen saıası laýazymdarǵa biliktilik talaptaryn belgileý joldary talqylanyp, memlekettik basqarý júıesine joǵary bilikti jas mamandardy tartý máselesi de sóz boldy.
Memlekettik qyzmettiń tıimdiligin arttyrýda mańyzdy ról atqartyn kadr prosesterin sıfrlandyrý jáne avtomattandyrý, memlekettik qyzmet salasyndaǵy zańnama men Ádep kodeksiniń saqtalýyna baqylaý jasaý baǵyttary da nazardan tys qalmady.
Al memlekettik qyzmet salasyn baqylaýǵa qatysty tolyǵyraq aqparat bergen agenttik tóraǵasy ótken jyly 743 tekserý ótkizilip, 15 myńnan astam zań buzýshylyqtyń anyqtalǵanyn málimdedi.
Memlekettik qyzmet salasyndaǵy saıasatty iske asyrý boıynsha atqarylǵan jumystarǵa keńinen toqtalǵan agenttik tóraǵasy negizgi basymdyq – Memleket basshysy alǵa qoıǵan mindetterden týyndaıtyn strategııalyq-ınnovasııalyq memlekettik qyzmetti qalyptastyrý bolyp qalatynyn qadap aıtty.
Alqa otyrysyna Prezıdent Ákimshiligi Basshysynyń orynbasary Tımýr Súleımenov, Qaraǵandy oblysynyń ákimi Jeńis Qasymbek, Prezıdent Ákimshiligi men Premer-Mınıstr Keńsesiniń, halyqaralyq uıymdar men azamattyq qoǵamnyń ókilderi jáne agenttiktiń jáne oǵan baǵynysty uıymdar men aýmaqtyq departamentteriniń qyzmetkerleri qatysyp, oılaryn ortaǵa saldy.
