«Qazmedıa» ortalyǵynda Qazaqstan Respýblıkasy Prezıdenti janyndaǵy Ortalyq kommýnıkasııalar qyzmeti arqaýynda «Ádebıet portaly» Internet-resýrsynyń tusaýkeser rásimi ótti.
«Qazmedıa» ortalyǵynda Qazaqstan Respýblıkasy Prezıdenti janyndaǵy Ortalyq kommýnıkasııalar qyzmeti arqaýynda «Ádebıet portaly» Internet-resýrsynyń tusaýkeser rásimi ótti.
Portaldy Mádenıet jáne aqparat mınıstrliginiń jáne Prezıdent janyndaǵy ortalyq kommýnıkasııalar qyzmetiniń qoldaýymen «Qazkontent» aksıonerlik qoǵamy ázirlegen. Jıynda «Qazkontent» aksıonerlik qoǵamy basqarma basshysynyń orynbasary Nartaı Áshim zaman talabyna sáıkes týǵan ádebıetimizdiń de ınternet júıesinen óz ornyn alatyn sáttiń jetkenin baıandady. Veb-portaldyń negizgi maqsaty – jas aqyn-jazýshylarǵa aqparattyq qoldaý kórsetip, qazaq ádebıetin ınternet áleminde júıeli túrde nasıhattaý ekenin, munda qazaq jáne álem ádebıetiniń úlken elektrondy qory jınaqtalǵanyn jetkizdi. «Ádebıetshiler mundaǵy kitaptarǵa onlaın túrinde syn-pikirlerin qaldyra alady. Portal ensıklopedııalyq qyzmet atqarady. Bul jerde ár avtorǵa jeke bet arnalǵan jáne olardyń shyǵarmashylyǵyna qatysty barlyq derekter toptastyrylǵan. Ár avtor óz shyǵarmashylyǵyn udaıy damytý maqsatynda ádebı blog júrgize alady. Portalda jas avtorlar úshin arnaıy «Jas avtorlar minberi» aıdary jáne «Ashyq minber» blogy da eskerilgen», – dedi ol.
«Ádebıet portaly» – tek onlaın kitaphana ǵana emes, kásibı aqyn-jazýshylar men jas avtorlar úshin de biregeı kommýnıkasııalyq ádebı alań. Munda «Aýdarma», «Mazmun», «Hat», «Illıýstrasııa» jáne «Poezııa álemi» jobalary bar. Jobalardyń sheńberinde oqyrman qazaq tiline aýdarylǵan álem ádebıetimen, álem tilderine aýdarylǵan otandyq shyǵarmalarmen, ádebıettiń kórnekti ókilderiniń qundy hattarymen tanysa alady.
Portaldyń tusaýkeser rásimine aqyn, Parlament Senatynyń depýtaty, Qazaqstan Jazýshylar odaǵynyń tóraǵasy Nurlan Orazalın qatysty. Ol sońǵy onjyldyqta ınternet, saıt, portal uǵymdarynyń qoǵamdyq ómirge dendep engenin, bul oraıda qazaq ádebıeti úshin de úlken bir portaldyń ashylýy qajettilik ekenin alǵa tartty. «Ádebıet qaı dáýirde de halyqtan bólek ómir súrmeıdi. Sondyqtan ádebı shyǵarmalar árqashan da oqyrmandaryn kútetini zańdy. Bul oraıda ádebıetti nasıhattap, oqyrmandardyń qataryn kóbeıtý úshin portal ashyp jatqan jigitterge rızashylyǵymdy aıtamyn. Otandastarymyzdyń kitap oqýǵa degen qulshynysy tómen emes. Kitap oqýdyń jańa dáýiri bastalǵan tusta onyń eseleneri sózsiz», dedi N.Orazalın.
Qazirgi ýaqytta portalda 1411-den asa kitap, 1184 avtordyń jeke paraqshasy jáne «Jas avtorlar minberi» aıdarynda respýblıkaǵa tanyla bastaǵan 27 avtor ornalasqan. Portaldaǵy kitaptar onlaın túrinde Pdf jáne ePub arnaıy oqý júıesi pishiminde jarııalanady.
Aıgúl SEIILOVA,
«Egemen Qazaqstan».
