Kezdesý barysynda Bostandyq aýdanynyń turǵyny Ánıpa Surapbergenova QazUÝ túlegi ekenin jáne ol ýnıversıtet jerin jekemenshikke berý týraly qaýeset estigenin aıtty. Sondaı-aq ol qala ákiminen bul aqparattyń qanshalyq ras ekenin surady.
Baqytjan Saǵyntaev joǵary oqý ornynyń aýmaǵyn eshkim jekemenshikke bermeıtinin basa aıtty.
Eske sala keteıik, buǵan deıin jelide QazUÝ-ǵa tıesili Almatydaǵy jer ýchaskesi jeke tulǵaǵa berildi degen aqparat paıda boldy. Keıin joǵary oqý ornyna ýnıversıtettiń jer telimderin satqany úshin aıyp ta taǵynǵan edi.
«Ýnıversıtet aınalasyndaǵy barlyq aýmaq ýnıversıtetke tıesili. Eger JOO bul jerdi basqa bireýge bergisi kelse, onda ol ákimdikke «jer maǵan kerek emes, ony keri qaıtaryp al» degen usynys aıtý kerek. Qazir ýnıversıtetke jańa rektor taǵaıyndaldy. Biz onymen kezdesip, osy taqyryp týraly sóılestik. Ol jerdi berý múmkin emes, bul durys emes jáne bul ýnıversıtetti damytý úshin qajet dep nyq aıtty. Bul − onyń usynysy. Sondyqtan búginde joǵary oqý ornynyń terrıtorııasyn basqa bireýge berý týraly áńgime joq ekenin taǵy aıtqym keledi», dep túsindirdi qala ákimi.
