Vedomstvo basshysy atynan marapatty áskerı qyzmetkerge Ulttyq ulannyń «Ońtústik» óńirlik qolbasshylyǵynyń qolbasshysy general-maıor Talapker Ámrıev tabys etti. Ol óz sózinde syn saǵatta qaısarlyq tanytqan Artemǵa alǵysyn bildirip, jaýyngerdiń jedel ári batyl áreketteriniń arqasynda jas qyzdyń ómiri qutqarylǵanyn alǵa tartty.
«Artemniń batyl áreketi ár qazaqstandyqqa, ásirese, onyń áriptesterine úlgi bolarlyq is. Jaýynger eńbek demalysynda júrgenine qaramastan, bir sátke de azamattyq ári kásibı paryzy týraly umytqan joq. О́kinishke qaraı, Ulttyq ulan jaýyngerleri qyzmet barysynda mundaı oqıǵalarmen jıi qaqtyǵysady. О́z ómirlerine tóngen qaýipterge qaramastan jaýyngerler múdirmeı, azamattardy túrli jaǵdaılardan qutqaryp jatady. Bul – olardyń qyzmettik paryzy, Áskerı anttaryna degen adaldyqtyń belgisi», dedi Talapker Qydyruly.
Shymkent qalasy Polısııa departamentiniń basshylyǵy da sarbazdyń erligin elep, ony gramotamen marapattady.
Esterińizge sala ketsek, oqıǵa aqpannyń 13-i kúni saǵat 00.40 shamasynda Shymkent qalasynda oryn aldy. Úıine kele jatqan Artem qatty aıqaılap kómekke shaqyrǵan áıel adamnyń daýysyn estip, oılanbastan sol jaqqa qaraı umtylady. Eńgezerdeı eki er adamnyń jas qyzǵa kúsh kórsetip, zorlaýǵa áreket jasap jatqanyn baıqaǵan jaýynger birden olarmen arpalysa ketedi. Buzaqylardyń bireýin shetke laqtyryp tastap, ekinshisimen tóbelese jóneledi. Jekpe-jek urys tásilderin qoldana otyryp, bireýin jerge qulatyp, ústinen basyp otyrady, al ekinshisi sol mezette oqıǵa ornynan qashyp úlgeredi.
Ustalǵan azamatty oqıǵa ornynan polısııa qyzmetkerleri alyp ketip, Shymkent qalasynyń Eńbekshi aýdandyq polısııa basqarmasyna jetkizdi. Kúdiktilerli ustaý kezinde ulandyq qolyn jaraqattap alady. Keıin belgili bolǵandaı, Artem qolyn syndyryp alǵan eken. Biraq soǵan qaramastan, jaýynger polısııa qyzmetkerleri kelgenshe buzaqyny jibermegen.
Qazirgi tańda bul is boıynsha qylmystyq is qozǵaldy. Ekinshi kúdikti aqpannyń 21-i kúni jedel-izdestirý sharalary kezinde ustalyp, óz kinásin moıyndady.
Qatardaǵy Artem Kalashnıkov Ulttyq ulannyń áskerı bólimderi qamqorlyq jasaıtyn «Jas búrkit» áskerı-patrıottyq klýbynyń tárbıelenýshisi bolyp tabylady. Qazaqstan ınjenerlik-pedagogıkalyq ýnıversıtetin támamdaǵan. 2017 jyly Otan aldyndaǵy áskerı boryshyn ótep, keıin Ulttyq ulan qataryna kelisimshart boıynsha qyzmetke ornalasqan. Búgingi tańda Shymkenttegi 6506 áskerı bóliminde áskerı jasaq bastyǵy laýazymynda qyzmet etip, qala kóshelerinde qoǵamdyq tártip pen qaýipsizdikti qamtamasyz etip keledi.
Jaýynger óziniń boıjetkenge jasaǵan kómegin erlik dep sanamaı, bul onyń qazirgi qyzmettegi tikeleı mindeti ekenin alǵa tartyp otyr.
