«Búgin Qazaqstan men Túrkııa arasynda dıplomatııalyq qatynastarynyń 29 jyldyǵyn atap ótýdemiz.
Tamyry ortaq tarıhymyz ben mádenı jáne rýhanı baılanystarymyzǵa negizdelgen túrik-qazaq baýyrlastyǵynyń 30 jylǵa jýyq ýaqyt boıy nyǵaıyp kele jatqanyna, elderimiz arasyndaǵy yntymaqtastyqtyń barlyq salada damyǵanyna rızashylyqpen kýá bolýdamyz.
Dıplomatııalyq qatynastar ornaǵannan keıin elderimiz arasynda qol qoıylǵan kóptegen kelisimder men hattamalar qarym-qatynasymyz ben yntymaqtastyǵymyzdyń quqyqtyq negizin qalady. Dos jáne baýyrlas el - Qazaqstanmen qarym-qatynasymyz ózara senim men yntymaqtastyq túsinigi negizinde tez damyp, búgingi kúni kóp ólshemdi strategııalyq áriptestik deńgeıine kóterildi.
Qarym-qatynasymyz saıası salada damyp qana qoımaı, áleýmettik-gýmanıtarlyq, ekonomıkalyq, mádenı syndy keń aýqymdy salalardaǵy jetistikter elderimizdi bir-birine odan ári jaqyndastyra túsýde. Túrkııadan Qazaqstanǵa quıylǵan ınvestısııanyń jalpy kólemi 3,2 mlrd AQSh dollaryn qurady. 2020 jyly pandemııa jaǵdaıyna qaramastan ekijaqty saýda aınalymy 3 mlrd AQSh dollarynan asyp tústi. Bul kórsetkishti aldaǵy ýaqytta 5 mlrd dollar, keıin 10 mlrd dollarǵa jetkizý, sondaı-aq birlesken ınvestısııalarymyzdy sapalyq jáne sandyq jaǵynan ulǵaıtý bizdiń ortaq maqsatymyz bolyp otyr.
Elderimizdiń arasyndaǵy bilim jáne mádenı qatynastar da halyqtarymyzdyń bir-birin jaqsyraq tanýǵa múmkindik beredi. Búgingi tańda 5000-ǵa jýyq qazaq stýdentteri bizdiń elimizde «Túrkııa stıpendııalary» baǵdarlamasy aıasynda bakalavrıat, magıstratýra jáne doktorantýra boıynsha bilim aldy.
Ekijaqty deńgeıde de kópjaqty platformalarda da elderimiz arasyndaǵy strategııalyq áriptestikke negizdelgen tyǵyz yntymaqtastyǵymyz óńirlik turaqtylyq, beıbitshilik jáne órkendeýge mańyzdy úlester qosýda.
Osy múmkindikti paıdalana otyryp, túrik jáne qazaq halyqtary arasyndaǵy myzǵymas dostyǵynyń árdaıym jalǵasýyn tilep, Qazaqstan halqyna gúldený, tynyshtyq pen amandyq tilekterimizdi usynamyz», delingen habarlamada.
