Qurǵaq jáne ystyq klımatqa jáne kún sáýlesine tózimdi týıa - ómir aǵashy dep atalatyny belgili.
Túrkistanǵa jasaǵan sapar barysynda qasıetti jerge aǵash otyrǵyzýǵa qatysqan qonaqtar bul isti jaqsylyqqa joryp, mýzeı basshylyǵyna alǵys aıtty.
Allanyń sońǵy da súıikti elshisi Muhammed (s.ǵ.s.) paıǵambardyń sahabasy Úkasha ata kesenesinde quran baǵyshtap, qasıetti qudyǵynan dám tatqan túrkııalyq BAQ ókilderi qasıetti de kıeli, tarıhı oryndy alys-jaqyn shet el týrısteriniń de nazaryna usynýǵa laıyq birden-bir obekt ekenin jetkizdi.
Aıta ketsek, «Áziret Sultan» memlekettik tarıhı-mádenı qoryq-mýzeıine qarasty respýblıkalyq mańyzy bar eskertkishter qataryna kiretin Úkasha ata kesenesi men qudyǵynda sońǵy jyldary jańa jobalar men abattandyrý jumystary qarqyn alýda. Byltyr Úkasha ata kesenesi men qudyǵynyń aınalasy tazartylyp, oryndyqtar qaıta jasaldy. Avtoturaqqa jańadan elektr shamdary tartylyp, jaryqtandyryldy. Zııaratshylar demalatyn oryndar halyq ıgiligine berildi. Sondaı-aq mýzeılendirý jumystary boıynsha «Úkasha ata tarıhy» mýzeıi kelýshilerge esigin aıqara ashty. Mýzeı ekspozısııasyna Úkasha sahabanyń ómirinen syr shertetin qundy málimetter men 70-ten astam arheologııalyq, etnografııalyq, jazba mádenıetine qatysty jádigerler qoıyldy. Zııaratshylardyń ótinishterin qanaǵattandyrý maqsatynda, otyn, sý qoıatyn úlken bastyrma jasalyp, halyq ıgiligine berildi. Baba basyna baratyn júrginshi joldar qaıta jóndeldi. Qudyqqa kóteriletin jolǵa múgedekterge arnalǵan arnaıy jol salyp, pandýs ornatyldy. Tazalyq jumystaryna baılanysty arnaıy qaldyq jáshikter men eskertpe taqtaıshalary qoıylyp, Úkasha ata kesenesi mańyna 100-den astam máýe aǵashtary men shyrsha taldary jáne gúlder otyrǵyzylǵan bolatyn.
«Áziret Sultan» memlekettik tarıhı-mádenı qoryq-mýzeıi» RMQK qabyldaǵan 2018-2021 jyldarǵan arnalǵan damý josparyna sáıkes tarıhı oryndardy abattandyrý, kelgen týrıster men zııaratshylarǵa sapaly qyzmet kórsetý boıynsha birqatar jumystar demeýshilerdi tarta otyryp júzege asýda.
Tarıhı-kıeli oryndardy abattandyrý jáne mýzeılendirý jumystary aldaǵy ýaqytta da jalǵasyn tabatyn bolady.
