Baspasóz qyzmeti taratqan aqparatqa sáıkes, Elbasy, Partııa Lıderi Nursultan Nazarbaevtyń tapsyrmasy boıynsha belgilengen kvotanyń arqasynda barlyq deńgeıdegi máslıhattarda «Nur Otan» partııasynyń jas depýtattarynyń sany 3 esege – 7-den 23%-ǵa deıin artty. 2025 jylǵa deıingi «Jastar – Otanǵa!» baǵdarlamasy qabyldanyp, onda áleýmettik lıft qurý, jastardyń bastamalaryn iske asyrý, jumysqa ornalastyrý, bilim berý sapasyn arttyrý sııaqty jáne t. b. 100-den astam naqty sharalar qamtyldy.
«Korpýs jumysy aıasynda turǵyndarmen tyǵyz qarym-qatynas ornatyp, ártúrli sanattaǵy jastarmen baılanys ornatý mańyzdy. Onyń ishinde áleýmettik jeli arqyly jumys isteýge, barynsha ashyq ári halyqqa jaqyn bolýǵa den qoıý qajet. Sizderdiń árqaısyńyz – Partııanyń senim mandatyna ıe bolǵan jas saıasatkersizder. Partııanyń halyqqa jaqyn bolý, turǵyndarmen «keri baılanys» ornatý, qoǵamdaǵy ár túrli toptardyń únine qulaq asyp, elmen tyǵyz, qoıan-qoltyq jumys isteý qaǵıdalaryn basshylyqqa alý kerek. Atalǵan tapsyrmalardy sapaly jáne nátıjeli iske asyrý úshin Jas depýtattar korpýsyna partııa tarapynan barynsha qoldaý kórsetiletin bolady», - dedi jastarmen ótken onlaın kezdesý barysynda partııa Hatshysy Álibek Áldeneı.
Partııanyń baspasóz qyzmetinde atap ótkendeı, Májilis pen barlyq deńgeıdegi máslıhattardyń 616 jas depýtatynyń 427-si nemese 69%-y partııa Lıderi Nursultan Nazarbaevtyń bastamasymen júzege asqan partııaishilik praımerızden ótkender.
Daýys berý qorytyndysy boıynsha Jas depýtattar korpýsynyń basshysy bolyp Parlament Májilisindegi «Nur Otan» partııasy fraksııasynyń depýtaty Elnur Beısenbaev saılandy.
