Aýyldarǵa aýyz sýdyń jetýin Nur Otan baqylaıdy

Indýstrııa jáne ınfraqurylymdyq damý mınıstrliginiń aqparatyna sensek, ótken jyly elimiz boıynsha halyqtyń 93,1%-y ortalyqtandyrylǵan sýmen jabdyqtaýǵa qol jetkizgen. Bıyl sýmen jabdyqtaý jáne sý burý júıelerin damytý boıynsha 319 jobany iske asyrýǵa 125 mlrd teńge bólinip, 793 aýyldy aýyz sýmen qamtamasyz etý josparlanýda.

Keńes tóraǵasy, Májilis depýtaty Erlan Saırovtyń aıtýynsha, partııanyń qoǵamdyq qabyldaýlary men BAQ arqyly halyq kótergen rezonanstyq máselelerdi taldaǵan kezde, sapaly aýyz sýmen qamtamasyz etý máselesi áli de ózekti bolyp otyr.

Mysaly, Sátbaev jáne Jezqazǵan qalalaryn sýmen qamtamasyz etý úshin Esqula sý tartqysh qubyrynyń qurylysy 10 jyl boıy júrgizilip keledi. Atalǵan sý taratqysh trassasy topyraqtyń qulaý aımaǵy arqyly ótkeni, al jobada qarastyrylǵan sýdy zalalsyzdandyrý jabdyǵynyń esh jerde shyǵarylmaıtyny anyqtaldy. Bul árıne, jumystyń toqtap qalýyna jáne jobany túzetý qajettiligine, sondaı-aq qurylys qunynyń qymbattaýyna ákep soqqany sózsiz. Jobany iske asyrýǵa 6,32 mlrd teńge jumsaldy. Mundaǵy jumystardy júrgizýdiń normatıvtik merzimi buzylýyna jáne jabdyqtardyń turyp qalýyna baılanysty qazirdiń ózinde qalpyna keltirý jumystaryn qajet etedi. Ol úshin bıýdjetten qosymsha 463 mln teńge suralyp otyr.

«Infraqurylymdy josparlaý kezeńinde-aq kóptegen problemalar bolǵan, sý aıdaý eldi mekennen alys ornalasqan jáne magıstral salý úshin qosymsha qarajat pen ýaqyt qajet bolady. Al iri eldi mekenderden sý aıdaý úshin ol jerlerde qýat jetkiliksiz. Jalpy, ortalyq jáne jergilikti organdardyń josparlaý kezinde jibergen osyndaı nemquraıdylyǵy halyqtyń memleketke degen senimsizdigin týdyrady», dedi Májilistegi «Nur Otan» partııasy fraksııasynyń depýtaty Iýrıı Jýlın.

Tutastaı alǵanda, materıaldarǵa júrgizilgen taldaý memlekettik jáne óńirlik baǵdarlamalar sheńberinde halyqty aýyz sýmen qamtamasyz etý máselesi boıynsha bólinetin bıýdjet qarajatyn jumsaý salasyndaǵy zańbuzýshylyqtar olardy iske asyrýdyń barlyq derlik kezeńderin qamtıtynyn kórsetti.

«Memlekettik baǵdarlamalardy iske asyrý kezinde aıtarlyqtaı kóp olqylyqtar, kemshilikter, vedomstvolardyń birlesip jumys isteı almaýy, jaýapkershilikti bir-birine ysyra salýy jáne máseleni ashyq kótermeı, beıqamdyq tanytý oryn alyp otyr. Jobanyń oryndalýyna jáne onyń tıimdiligine ýákiletti organdar tarapynan baqylaýdyń bolmaýy, aıaqtalmaǵan, jumys istemeıtin nysandardyń qaraýsyz qalýyna jáne paıdalanýǵa qabyldaýǵa ákep soqtyrýda. Osydan soń jobada qoıylatyn sapa, qýat, ónimdilik ólshemderine jaýap bermeıtin nysandar paıdalanýǵa beriledi. Indýstrııa jáne ınfraqurylymdyq damý mınıstrligi aýdıt júrgizip, ony jurtshylyqqa usynýy tıis dep sanaımyz», dedi Erlan Saırov.

Sondaı-aq otyrys barysynda Batys Qazaqstan oblysyndaǵy sybaılas jemqorlyqqa qarsy is-qımyl jumystarynyń tıimdiligi máselesi qaraldy.

Keńes jumys tobynyń músheleri óńirdegi qylmystardyń kópshiligin jergilikti atqarýshy organdardyń memlekettik qyzmetshileri jasaıtynyn atap ótti. Olar laýazymdyq ókilettikterin teris paıdalaný jáne bıýdjet qarajatyn urlaý faktileri boıynsha, onyń ishinde memlekettik baǵdarlamalardy iske asyrý kezinde jáne oryndalǵan jumys aktilerine qol qoıý, jumysqa ornalastyrý, jalaqy esepteý kezinde zańsyzdyqtarǵa jol beredi.

Sybaılas jemqorlyqqa qarsy kúres jónindegi vedomstvoaralyq komıssııa tıimdiliginiń tómendigi atap ótildi. Bul rette ártúrli oblystyq basqarmalardyń jartysynan kóbi sybaılas jemqorlyqqa qarsy saıasat týraly esep bere almady

«О́ńirde asa mańyzdy máselelerdi sheshýde qoǵamdyq baqylaýǵa jetkilikti kóńil bólinbeıdi. Kóptegen sheshimder júrdim-bardym qabyldanady jáne bul aspekt azamattardyń kóńilin qaldyrady. Joǵary deńgeıdegi sheneýnikterdiń árbir qadamy, is-áreketi, nıeti jurtqa ashyq ta, túsinikti bolýy kerek. Sybaılas jemqorlyqqa qarsy is-qımyldaǵy basty mindet – qoǵamda sybaılas jemqorlyqqa qarsy dúnıetanym men quqyqtyq sanany qalyptastyrý», dep atap ótti Erlan Saırov.