Kollajdy jasaǵan Záýresh SMAǴUL, «EQ»
Qazaqstandyq vaksınany synaýdyń úshinshi kezeńi Hattamada kózdelgen zertteý sýbektileriniń 50% belgisinen ótti jáne ony aǵymdaǵy jyldyń 25 maýsymynda aıaqtaý josparlanyp otyr. Osydan keıin QazVac tıimdiligin tolyq baǵalaý júrgiziledi.
Vaksınalardyń klınıkalyq zertteýleri, sonyń ishinde III fazada, búkil álemde jalǵasýda. Reseı Federasııasy «Spýtnık V» zertteýlerin 2021 jyldyń mamyr aıynyń basynda aıaqtaýdy josparlap otyr, al álemdegi kóptegen farmasevtıkalyq kompanııalar óz zertteýlerin 2022-2023 jyldary shegine jetkizedi.
Qalyptasqan epıdemııalyq jaǵdaıǵa baılanysty koronavırýs ınfeksııasyna qarsy vaksınalardy medısınalyq qoldanýǵa jedel jiberý týraly sheshimder álemniń kóptegen retteýshi organdarynda qabyldanady. Vaksınalaý aýrýdyń taralýyna qarsy kúresýdiń eń tıimdi ádisi jáne ujymdyq ımmýnıtetti qalyptastyrýdyń senimdi ádisi bolyp qala beredi. Bul rette, vaksınalardy qoldanýǵa ruqsat etýdiń qysqa merzimine qaramastan, onyń sapasy men qaýipsizdigin tekserý muqııat jáne barlyq talapty saqtaı otyryp júrgiziletinin aıta ketken lázim. Jaǵymsyz reaksııalar anyqtalǵan, «paıda-táýekeldiń» qolaısyz araqatynasy týraly derekter alynǵan nemese ónertabysqa nemese paıdaly modelge úshinshi tulǵalardyń aıryqsha quqyqtaryn buzý týraly kúshine engen sot sheshimi bolǵan jaǵdaılarda vaksınany ýaqytsha tirkeý toqtatyla turýy nemese joıylýy múmkin ekenin atap ótken jón.
Qazaqstanda COVID-19-ǵa qarsy vaksınalaý erikti túrde júrgiziledi jáne vaksınalanýshy vaksınalaý kezinde qoljetimdi vaksınalaýdan ózi ekkisi keletin vaksınany tańdaýǵa da quqyly.
Aıta ketelik, QazVac vaksınasy – Bilim jáne ǵylym mınıstrliginiń Bıologııalyq qaýipsizdik problemalarynyń ǵylymı-zertteý ınstıtýty ázirlegen COVID-19-ǵa qarsy belsendiligi joıylǵan vaksına. Aldyn ala málimetter boıynsha onyń tıimdiligi 90%-dan joǵary.
2020 jylǵy 31 jeltoqsanda «Qazaqstan Respýblıkasynda óndirilgen COVID-19 koronavırýsyna qarsy vaksınalardy ýaqytsha memlekettik tirkeý qaǵıdalaryn bekitý týraly» Qazaqstan Respýblıkasy Úkimetiniń 2020 jylǵy 15 jeltoqsandaǵy №850 qaýlysynyń negizinde vaksınaǵa 30.09.2021 jylǵa deıingi merzimge 31.12.2020 jylǵy QR-BP-№1 ýaqytsha tirkeý kýáligi berildi.
Vaksınalaý bulshyqet ishine 2 kezeńde júrgiziledi, birinshi jáne ekinshi dozany engizý arasyndaǵy aralyq – 21 kún. Vaksınalaý pýnktinde aldymen tekserý júrgiziledi, saýaldama toltyrylady jáne vaksınalaýǵa jazbasha aqparat beriledi. Vaksınalaý 18 jastan asqan adamdarǵa usynylady. 18 jasqa deıingi balalar úshin tıimdilik pen qaýipsizdik zerttelmegen.
QazVac vaksınasynyń 50 myń dozasy óńirlerge taratyldy: 6 myń dozadan Nur-Sultan men Almaty, 4 myń dozadan Shymkent qalasy jáne Qaraǵandy, Shyǵys Qazaqstan, Almaty oblystary, qalǵan óńirler 2 myń dozadan aldy. Mamyr aıynda taǵy 50 myń doza shyǵarylady dep kútilýde. Bolashaqta preparat óndirisi kezeń-kezeńimen aıyna 500 myń dozaǵa deıin artady.
