«Tumar» ulttyq televızııalyq báıgesi jeńimpazdaryn marapattaý rásimine qosh keldińizder! Bıyl V-shi ret ótip otyrǵan bul joba júzden júırik shyqqan jańa esimderdi jyl saıyn jarııalap, jalyndy tulǵalar men tyń bastamalardyń jasampaz jolyna aınaldy. Sóz joq, búgingi televızııa – tek aqparat kózi ǵana emes, bul ulttyq ıdeologııa men tálim-tárbıeniń quraly. Al endi osynaý strategııalyq mańyzy zor salanyń baryn baptap, joǵyn joqtap júrgen – myna ózderińiz. Endeshe, osyndaı aýqymdy jobalardy batyl qolǵa alyp, olardy bıik sapada oryndap júrgen sizderge zor alǵysymdy bildirgim keledi», dedi mınıstr.
Budan ózge, vedomstvo basshysy bıylǵy báıge el Táýelsizdiginiń 30 jyldyǵy aıasynda ótip jatqanyn tilge tıek etti.
«О́zderińiz kýá, osy 30 jyldyń ishinde el damýy men ulttyq BAQ, sonyń ishinde televızııa salasy úlken ózgeristerden ótti. Qarqyndy damyp, nátıjeli bıikterdi baǵyndyrdy. Bul árıne, eń aldymen Tuńǵysh Prezıdent – Elbasymyzdyń aqparat salasynda qalyptastyrǵan oń saıasatynyń nátıjesi, el basshylyǵynyń udaıy qoldaýynyń arqasy. О́tken 20-shy jyl elimiz úshin úlken synaq jyly boldy. Álemdik pandemııa bastalǵanda tilshiler qaýymy sonyń ishinde telejýrnalıster qaýymy ómirin qaýip-qaterge tóndirip, oǵan qaramastan kún demeı, tún demeı jumys istep, halyqqa shynaıy aqparat jetkizdi», dedi Aıda Balaeva.
Mınıstr ótken jyly teleaýdıtorııa ósimi 22 paıyzdy quraǵanyn, otandyq televızııalyq ónimge suranystyń artqanyn aıtty. Álemdik jetekshi medıakompanııalarmen halyqaralyq yntymaqtastyq nyǵaıtylyp, qazaqstandyq ónimderdi shet elderde ilgeriletý jumysy jandandyrylǵandyǵyn atap ótti. Sonymen qatar Reseı, Túrkııa, О́zbekstan, Qyrǵyzstan telekompanııalarymen birlesken televızııalyq ónim shyǵarý boıynsha ýaǵdalastyqqa qol jetkizilgenine nazar aýdardy.
«Árıne, bul – osy bir jylda atqarylǵan kóp jumystyń azǵantaı bóligi ǵana. Onyń bárin qazir tizip aıtý múmkin emes. Eń bastysy – bolashaq baǵdarymyz anyq, josparymyz aıqyn. О́kinishke qaraı, qoǵam áli de álemdik pandemııanyń yqpalynda. Sondyqtan «Tumar» syılyǵy bıyl 2-shi márte onlaın formatta ótip otyr. Byl 48 otandyq televızııa ókiline «Tumar» báıgesiniń syılyǵy tabystalady. Onyń arasynda tanymal rejısserler men jýrnalıster, kásibı operatorlar men ssenarıster bar. Sóz joq, olardyń jasaǵan jumysy men jobalary otandyq televızııanyń básekege qabilettiligin arttyryp, kásibı deńgeıge, jańa bıikke kóteredi dep senemiz», dedi mınıstr.
Aıda Balaeva sóz sońynda barsha qazaqstandyqtardy 7 mamyr – Otan qorǵaýshy kúnimen jáne 9 mamyr – Uly Jeńis merekesimen quttyqtady.
«Árıne, otan qorǵaý uǵymynyń maǵynasy tereń. Shúkir búginde tynysh zaman, berekeli ómir keshýdemiz. Desede, beıbit zamannyń da óz synaqtary men mindeti bar. Osy ortaq maqsat jolynda qıyndyqtardy birge eńserip, jetistikterge birge jeteıik», dedi ol.
