Gýmanıtarlyq kómekti tapsyrý rásimine Qazaqstan Elshisi Rápil Joshybaev jáne Qyrǵyzstannyń Aýyl, sý jáne orman sharýashylyǵy mınıstriniń orynbasary Azamat Mýkashev qatysty.
Júk barlyq sanıtarlyq-epıdemıologııalyq normalar saqtala otyryp, temirjol arqyly 75 vagonmen jetkizildi.
Mınıstrdiń orynbasary A.Mýkashev qyrǵyz tarapy Qazaqstan Úkimetiniń kórsetken kómegini joǵary baǵalaıtynyn baýyrlas qazaq halqyna tereń rızashylyq bildiretinin atap ótti.
Memleket basshysy Qyrǵyz Respýblıkasymen dástúrli dostyq, odaqtastyq jáne strategııalyq áriptestik qaǵıdattaryn basshylyqqa ala otyryp, Qazaqstan halqynyń atynan baýyrlas qyrǵyz halqyna gýmanıtarlyq kómek kórsetý týraly sheshim qabyldaǵany belgili. Beriletin gýmanıtarlyq kómektiń jalpy kólemi 10 myń tonna undy quraıdy.
Aıta ketý kerek, COVID-19 pandemııasy bastalǵaly beri Qazaqstan qyrǵyz tarapynyń ótinishi negizinde Qyrǵyzstanǵa gýmanıtarlyq kómek kórsetip keledi.
Atap aıtqanda, 2020 jyldyń mamyr aıynda kórshi elge 5 myń tonna qazaqstandyq un tegin berildi. Al sol jylǵy qarashada Qazaqstan úkimeti Qyrǵyzstanǵa elimizde shyǵarylǵan 400 portatıvti ókpe jeldetý apparaty men 2 mln medısınalyq betperde jiberdi.
