«Sońǵy 30 jyldyń ishinde stıpendııa jáne jalpy memlekettik tapsyrys JOO-ǵa aýdarylatyn. Odan ári joǵary oqý oryndary stýdentterdiń úlgerimine qarap, stıpendııa beretin. Biz munda kóptegen táýekeldi, sonyń ishinde sybaılas jemqorlyq táýekelderin de kórip otyrmyz. Búgingi tańda úsh JOO qanatqaqty jobaǵa qatysyp jatyr, 21 JOO osy shema boıynsha shart jasasty. Biz bul qanatqaqty jobany shilde aıyna deıin aıaqtaýdy jáne shilde aıynan bastap osy júıeni engizýdi josparlap otyrmyz», dedi vıse-mınıstr B.Asylova.
Stıpendııalardy tóleý jónindegi fýnksııany Qarjy ortalyǵy júzege asyrady. О́z kezeginde JOO stýdentterdiń úlgerimi men mártebesi (oqýǵa túsý, aıaqtaý, oqýdan shyǵarý jáne t.b.) boıynsha málimetti tıisti aqparattyq júıe arqyly beredi.
Kórsetilgen derekterdi Qarjy ortalyǵy memlekettik derekqorlarmen salystyryp tekseredi. Tolyq salystyrýdan keıin aqparattyq júıe stıpendııanyń mólsherin avtomatty túrde esepteıdi, keıin stýdentterge qarajat aýdarý úshin ekinshi deńgeıdegi bankterge esep-qısap jiberiletin bolady. Bul tetikti JOO-ǵa grant alýshy stýdentter úshin oqý aqysyn tóleý kezinde de qoldaný josparlanǵanyn atap ótken jón.
«Grant – bul stýdent alatyn qarajattyń maqsatty somasy. Qazir bul qarajat tikeleı JOO-ǵa aýdarylǵan kezde, stýdent memleket oǵan aqsha tóleıtinin, ol úshin aqyly negizde oqıtyndar sııaqty toqsan saıyn oqý aqysy tólenetinin sezbeıdi. Sondyqtan qazir biz shartty túrde stýdenttiń eskroý-shotyna aqsha túsýi úshin jumys istep jatyrmyz. Biraq stýdent bul qarajatty ýnıversıtettegi oqý aqysyn tóleýden basqa maqsatta paıdalana almaıdy. Kredıtterdiń jınaqtalýyna qaraı ol bul tólemdi JOO-ǵa bank arqyly aýdaratyn bolady», dedi Bilim jáne ǵylym mınıstri Ashat Aımaǵambetov.
Osylaısha, jańa júıe memleket jyl saıyn stıpendııaǵa da, joǵary oqý oryndarynda oqýǵa da qarajatty tikeleı bilim alýshylarǵa ataýly aýdarý arqyly bóletin aqsha qarajatynyń ashyqtyǵyn qamtamasyz etedi. Budan bólek, júıedegi taǵy bir oń ózgeris – basqa JOO-ǵa aýysqan stýdentterge grantty saqtaı otyryp, stıpendııany úzdiksiz tóleý múmkindigi.
