Oblystyq densaýlyq saqtaý basqarmasy basshysynyń orynbasary Bekbolat Izbasarovtyń habarlaýynsha, jyl basynan beri 56 bala koronavırýstyń sımptomdy jáne sımptomsyz túrine shaldyqqan. Qazirgi ýaqytta stasıonarda 7 bala em qabyldap jatyr. Sondaı-aq jyl basynan beri 47 júkti áıelden osy derttiń belgileri tabylyp, sımptomdy túriniń belgileri baıqalǵan 27 áıel provızorlyq ortalyqqa jatqyzyldy. Kúni keshe ǵana oblystyq perınataldyq ortalyqta 30 jastaǵy kelinshek bosanǵannan keıin qaıtys boldy. Aldyn ala tekserý qorytyndysy boıynsha marqumnyń ókpesinen osy dert belgileri tabylǵan.
Qazirgi ýaqytta óńirde 11 laboratorııada turǵyndardan koronavırýs ınfeksııasyna qarsy PTR-test alynyp jatyr. Aqpannan beri turǵyndardy vaksınalaý qarqyndy jalǵasyp keledi. Bıylǵy aqpan aıynan qazirge deıin Aqtóbe oblysyna 105 200 dana ekpe jetkizilip, osy kezge deıin 1020 turǵyn ekpeniń birinshi komponentin aldy. Alaıda turǵyndar ekpeniń ekinshi komponentine tapshylyq sezilgenin aıtyp, shaǵym túsirýde. О́ıtkeni sońǵy kúnderi emhanalarǵa ekpe alýǵa barǵan turǵyndardy medısına qyzmetkerleri «keıin kelińiz» dep qaıtaryp jatyr. Osyǵan baılanysty oblystyq densaýlyq saqtaý basqarmasynyń basshylary turǵyndarǵa ekpe jumystarynyń barysy týraly jedel aqparat jetkizýi qajet.
О́z jumystaryn jalǵastyrý úshin kásipkerlik nysandarynan Ashyq jobasyn paıdalaný talap etiledi. Ekpe alǵan adamdar týraly derekter qosymshadan kórinbegendikten, kópshilik jurt ekpe alǵan azamattyń mártebesi qalaı kórsetiletinin surap jatyr.
«Atameken» óńirlik kásipkerlik palatasy mamandarynyń habarlaýynsha, qazirgi kezde Ashyq jobasyn vaksınalaý tólqujatymen biriktirý jumystary júrip jatyr. Júıelerdi ıntegrasııalaýdan keıin vaksına alǵan azamattarǵa qosymshada «jasyl» mártebe belgilenedi. Osynyń negizinde COVID-19-ǵa PTR-testileýi (72 saǵat) teris shyqqan adamdarda da «jasyl» mártebe bolady. «Kók» mártebe PTR-testileýi joq jáne naýqas adamdarmen baılanysta bolmaǵan adamdarǵa beriledi. Qosymshanyń qalǵan ádistemesi ózgerissiz qaldy. Eger adam PTR-test tapsyryp, oń nátıje shyqsa «qyzyl» tús beriledi. Mundaı jaǵdaıda osy azamat úıde oqshaýlaný rejimin qatań ustanýy kerek. «Sary» tús naýqas adammen baılanysta bolǵan adamdarǵa beriledi. Olarǵa azyq-túlik nemese úı janyndaǵy dárihanaǵa barýǵa ruqsat etiledi, biraq basqa nysandarǵa barýǵa tyıym salynady. «Kók» tús PTR-testileý tapsyrý mindetti oryndardan (mysaly, áýejaı) basqa barlyq jerge barýǵa ruqsat beredi. «Jasyl» tús – júrip-turýǵa tolyǵymen ruqsat degen sóz. Turǵyndar osylaısha ınfeksııa juqtyrý qaýpi boıynsha óz jaǵdaılaryn aldyn ala qashyqtan, úıde otyryp teksere alady.
Mamyr ortasynan aýsa da, koronavırýs ınfeksııasynyń azaıýyn áli eshkim tap basyp aıta almaı otyr. Dárigerler ekpe alǵan adamdardyń kóbeıýimen qaýipti indettiń taralý oshaǵy azaıady degen boljamdy ǵana jarııalady.
Aqtóbe oblysy
