Dáýren Abaev Qasym-Jomart Toqaev úshin prezıdenttiktiń alǵashq eki jyly ońaı bolmaǵanyn eske saldy.
«Bárinen buryn alǵashqy eki jyl Prezıdent Qasym-Jomart Kemeluly úshin kúrdeli synaqtarǵa toly boldy.
Solardyń ishinde eń negizgisi – koronavırýs pandemııasy. Álem endi ǵana jańa jaǵdaıǵa birtindep boı úıretip keledi. Biraq onyń ózi bárimizge aýyr kelip jatyr. Arystaǵy jaralys, Qordaı oqıǵasy, Maqtaaraldaǵy tasqyn sııaqty elde bolǵan tótenshe jaǵdaılardy da umytpaý kerek. Sondyqtan bárinen buryn Prezıdent osy eki jylda daǵdarys menedjeriniń rólin sátti oryndap shyqty deýge bolady. Oǵan eń bir qıyn kezderde qoǵamdy uıystyratyn kúrdeli ári batyl sheshimderdi jıi qabyldaýǵa týra keldi», dedi Prezıdent ákimshiliginiń ókili.
Onyń aıtýynsha, táýelsiz Qazaqstan tarıhyndaǵy ekinshi Preızdenttiń eń aıshyqty ereksheligi «Halyq únine qulaq asatyn memleket» saıasatyn usynýy bolyp otyr.
«Toqaev prezıdenttiginiń taǵy bir aıshyqty ereksheligi – «Halyq únine qulaq asatyn memleket» tujyrymdamasyn engizýi.
Bul – dál ýaqytynda qolǵa alynǵan jáne óte qajet tujyrym. Bul jaı ǵana prınsıp nemese ıdeıa emes, bul – saıasat. Osy saıasatty memlekettik basqarýdyń túrli deńgeıinde baıaý ári durys túsiný bolyp jatyr. Bilesiz be, «Halyq únine qulaq asatyn memleketti» qoǵamdyq oı-pikirge baǵdarlanýmen shatastyrmaý mańyzdy. Eger solaı bolǵanda qazir biz vaksınalaý júrgizip jatpaǵan bolar edik, karantındik shekteýler engizbes edik jáne kóptegen tanymal emes sheshimder qabyldamas edik. Halyq únine qulaq asatyn memleket - qoǵamnyń shynaıy qajettiligin, azamattardyń kókeıin túsiný jáne sony barynsha tıimdi qanaǵattandyrý. Árıne, halyqtyń suraýy ózgerip otyrýy múmkin», dedi Dáýren Abaev memlekettiń qolynda sol ózgeristerdi bekitip otyratyn mańyzdy ári salmaqty qural bolýy keregin aıta kele.
Sondaı-aq ol estıtin memleket tujyrymdamasyna transformasııalaný úrdisi eń birinshi Prezıdent ákimshiliginen bastalyp jatqanyn málim etti.
«Memlekettiń qolynda eldiń kókeıindegi ózgeristerdi bekitip otyratyn mańyzdy ári salmaqty qural bolýy kerek. Ol – azamattarmen kommýnıkasııa, áleýmettaný, sarapshylyq-taldaý jáne basqa da quraldar. Bılik organdarynda, ásirese Prezıdent ákimshiliginde osy komponentterdiń bári baıyppen kúsheıtilip jatyr.
Biz Memleket basshysynyń ıdeıasyn túsinýimiz kerek. Tek Halyq únine qulaq asatyn memleket qana ádiletti memleketke aınala alady. Al ádildik – Qasym-Jomart Toqaevtyń saılaýaldy baǵdarlamasyndaǵy negizgi taǵan», dedi Prezıdent ákimshiligi basshysynyń birinshi orynbasary.
