Joǵarǵy Sot sýdıasy Qanat Mýsınniń tóraǵalyǵymen ótken komıssııa otyrysynda mádenıet jáne óner salasyndaǵy qyzmetkerlerdiń áleýmettik-ekonomıkalyq jáne eńbek quqyqtaryn qamtamasyz etýdiń ózekti máseleleri keńinen sóz boldy. Baıandama jasaǵan Aqtoty Raıymqulova jergilikti atqarýshy organdardyń aqparatyna sáıkes búginde respýblıka boıynsha aımaqtarda 353 mádenıet nysany, onyń ishinde 127 mádenıet úıi, 113 kitaphana, 85 aýyldyq klýb, 10 teatr, 8 mýzeı, 2 konsert zaly jáne 2 mádenı-demalys uıymy jetispeıtinin aıtyp ótti.
«Mádenıet nysandaryn ońtaılandyrýǵa baılanysty jergilikti atqarýshy organdar osy saladaǵy ǵımarattardy qysqartyp jatyr. Bul úrdis taldaý jumystary kezinde anyq baıqaldy», degen mınıstr óńirlerde mádenıet uıymdaryn jappaı biriktirý tájirıbesi barlyq jerde qoldanylatynyn jetkizdi.
Bul, ásirese monoqalalar men aýyl halqynyń mádenı qundylyqtarǵa qoljetimdiligin shekteıtinin aıtqan ol: «Eldi mekenderdegi mádenıet nysandary kórsetetin qyzmetterdiń halyqqa qoljetimdiligin qamtamasyz etý úshin jergilikti atqarýshy organdarǵa eń tómengi memlekettik normatıvterdi saqtaý usynylady. Bul másele, atap aıtqanda, aýyl-aımaqtar men monoqalalarǵa qatysty. Mádenıet uıymdarynyń qyzmetterine teń qoljetimdilikti qamtamasyz etý jastardyń damýyna oń áserin tıgizeri sózsiz. Sol sebepti balalar men jasóspirimderdiń shyǵarmashylyq áleýetin arttyrýǵa erekshe mán bergen jón», dep atap ótti vedomstvo basshysy.
Mınıstr sondaı-aq qazirgi tańda jergilikti jerlerde jas mamandardy áleýmettik qoldaýǵa baǵyttalǵan birqatar baǵdarlamanyń jumys istemeıtinin de búkpesiz aıtty. «Mysaly, «Dıplommen – aýylǵa!» jobasy el óńirlerindegi kadr tapshylyǵy problemasyn sheshpeıdi», degen ol búgingi kúni aýyldyq jerlerdegi mádenıet uıymdaryna 1200-den astam kadr qajet ekenin aıtty.
«Arhıv salasyna bilikti kadr jetispeýshiliginiń basty sebebi –arhıvshi mamandyǵy mártebesiniń tómendiginde jatyr». Osylaı degen A.Raıymqulova joǵary oqý oryndarynyń bul baǵyt boıynsha mamandar daıarlaýǵa múddeli emes ekenin de synǵa aldy. Mysaly, búginde «Arhıv júrgizý», «Qujat júrgizý» jáne «Qujattamalyq qamtamasyz etý» mamandyqtary boıynsha mamandar daıarlaýdy elimiz boıynsha jalǵyz joǵary oqý orny – ál-Farabı atyndaǵy Qazaq ulttyq ýnıversıteti júzege asyrady. «Sondyqtan óńirlerdiń joǵary oqý oryndarynda arhıv isi jáne qujattama salasy boıynsha mamandyqtar ashý, Bilim jáne ǵylym mınıstrligi «Arhıvtaný», «Qujattaný» jáne «Qujattamalyq qamtamasyz etý» mamandyǵy boıynsha memlekettik granttardy ulǵaıtýy qajet», dedi baıandamashy.
Bul rette komıssııa músheleri oblystardyń, respýblıkalyq mańyzy bar qalalardyń, astananyń jergilikti atqarýshy organdary qyzmetiniń tıimdiligin jyl saıynǵy baǵalaý júıesine aýyldyq jáne qala mańyndaǵy eldi mekenderdiń mádenıet obektilerimen qamtamasyz etilýi sııaqty ólshemderdi engizýdi usyndy.
Memlekettiń basym mindetteriniń biri – mádenıet jáne óner mekemeleri qyzmetkerleriniń áleýmettik-ekonomıkalyq jáne eńbek quqyqtaryn qamtamasyz etý. Sol sebepti de jıynda sóz alǵan komıssııa músheleri bul sala qyzmetkerleriniń áleýmettik qorǵalý dárejesi – kez kelgen órkenıetti qoǵamnyń, memlekettik saıasattyń áleýmettik baǵytynyń basty ındıkatory bolyp tabylatynyn atap ótti.
Jıynǵa qatysqan Parlament, Úkimet, sot organdarynyń, bilim, ǵylym, mádenıet jáne óner mekemeleriniń, halyqaralyq jáne úkimettik emes uıymdardyń ókilderi, zańgerler tabysty memlekettiń mádenı saıasaty qoǵam men memleket tynys-tirshiliginiń barlyq mańyzdy aspektilerin damytýdyń sapaly ólshemi ekendigin atap kórsetti.
Otyrysta sondaı-aq arhıv mekemeleri, kitaphana júıesi úshin bilikti kadrlardy daıarlaý jáne qaıta daıarlaýdyń ózekti máseleleri jan-jaqty talqylandy.
Memlekettik áleýmettik tapsyrys sheńberinde mádenıet jáne óner salasyndaǵy áleýmettik mańyzy bar jobalardy qarjylandyrý kólemin ulǵaıtý, sondaı-aq elimizdiń arhıv mekemeleri úshin jańa ǵımarattar salýdy qarjylandyrý týraly máselelerdi qaraý usynyldy.
Budan basqa, komıssııa músheleri mádenıet pen óner salalarynda ǵylymı-zertteý jumystaryn damytý, mádenıet obektileri qyzmetin sıfrlandyrý, sondaı-aq Qazaqstannyń álemdik mádenı proseske yqpaldasý áleýetin jandandyrýǵa erekshe nazar aýdardy.
