Keńes tóraǵasy, Májilis depýtaty Mádı Ahmetovtiń aıtýynsha, sońǵy 4 jylda «Bastaý bıznes» jobasy boıynsha 150 myńnan astam adam oqyp shyqqan, alaıda onyń 30%-ten astamy ǵana jeke bıznesin ashqan.
«Memleket basshysy Qasym-Jomart Toqaev atap ótkendeı, baǵdarlamanyń qarjylyq jaǵyn ǵana emes, ony júzege asyrý tetikterin de qaıta qaraý kerek. Joba túlekteriniń 10%-y ǵana nesıe, 19%-y grant aldy. 100 myńnan astam adam memlekettik qoldaýdan tys qaldy. Ásirese, osy baǵdarlama boıynsha aýylda oqyǵandar úshin qarajat jetkiliksiz. Baǵdarlamanyń qarjylyq kólemin ǵana emes, ony iske asyrý tetikterin de qaıta qaraý qajet dep sanaımyn», dedi Mádı Ahmetov.
Bul rette Keńes tóraǵasy, jastardyń osyndaı baǵdarlamalardyń bar ekendiginen habary azdyǵyna nazar aýdardy.
«Jas kásipker» jobasy aıasynda úsh jyl boıy jumyssyz jastardy kásipkerlik negizderine oqytý jáne óz isin ashý úshin óteýsiz granttar berý josparlanǵan bolatyn. Bul úshin memlekettik bıýdjetten 32 mlrd teńge bólindi. Alaıda, qoıylǵan ındıkatorlar ishinara ǵana oryndaldy, al jobanyń ózi bir jyl ǵana jumys istedi», dep atap ótti ol.
О́z kezeginde, «Atameken» Ulttyq kásipkerler palatasy basqarma tóraǵasynyń birinshi orynbasary Narıman Ábilshaıyqov bıyl 30 myńǵa jýyq jumyssyzdy oqytý kózdelgenin, onyń ishinde 20 myńy NEET sanatyndaǵy (oqymaıtyn, jumys istemeıtin jáne biliktiligin arttyrmaıtyn) jastar qatarynan ekenin habarlady.
«Úsh jyl ishinde 300 myńǵa jýyq jas bıznes júrgizýdiń qyr-syryn meńgerýge tıis edi. Biraq is júzinde biz 2019 jyldan bastap «Jas kásipker» jobasy boıynsha 60 myń adamnyń ornyna 20 myń jas oqyp, tek 6 myńy ǵana bıznes ashqanyn kórip otyrmyz. Bul jerde beıindi vedomstvonyń nazaryn osy baǵyttaǵy jumysty jandandyrý qajettigine aýdarǵym keledi», dedi «Jas Otan» tóraǵasy Nurjan Jetpisbaev.
Sondaı-aq otyrys barysynda birqatar bastama kóterildi. Sonyń ishinde 29 jasqa deıingi jastar arasynan shyqqan kásipkerler qosymsha salyq jeńildikteri men memlekettik qoldaý alýy úshin «jas kásipker» uǵymyn zańdy túrde bekitýdi usyndy.
Budan basqa, Eńbek jáne áleýmettik qorǵaý mınıstrligine «Jas kásipker» jáne «Bastaý bıznes» jobalary týraly aqparattyq-túsindirý jumystaryn kúsheıtýdi, sondaı-aq granttyq qarjylandyrý mólsherin qazirgi 500 myńnan 1 mıllıon teńgege deıin ulǵaıtý týraly máseleni pysyqtaýdy usyndy.
