Bul jóninde «Semey Bus» JShS dırektory resmı málimdeme jasady. Bolat Qylyshbekovtiń aıtýynsha, jergilikti bılik tarapynan qoldaýdyń bolmaýy kásiporyn qarjylyq qıyndyqtarǵa tap bolǵan. Endi avtopark óz qyzmetin jalǵastyra almaıdy. Oǵan qosa, «Semey Bus» JShS basshylyǵy sotqa shaǵymdanatynyn aıtady.
«Semeı qalasynda jolaýshylar tasymalyn qoldaýdy jalǵastyra almaıtyn jaǵdaı qalyptasty», dep málimdedi «Semey Bus» JShS basshysy.
Vedomstvonyń málimetinshe, 20 shildege deıin «Semey Bus» JShS sot sheshimine shaǵymdana alady. Qala ákiminiń orynbasary Dmıtrıı Gavrıkov eger avtobýstar alynyp tastalsa, olar jańadan qurylatyn kásiporynǵa ótkiziledi dep málimdedi.
«Olar óz is-áreketterin resmı túrde toqtatqannan keıin, «QDB-Lızıng» AQ (qazirgi ónerkásipti damytý qory) shartynyń talaptaryna sáıkes «Semey Bus» JShS óz avtobýstaryn menshik ıesine, ıaǵnı «QDB-Lızıng» AQ-ǵa berýge mindetti. Bul 170 avtobýs, onyń 70-i buzylǵan. Olardy alyp qoıǵan jaǵdaıda jańa kásiporyn qurý týraly másele sheshiletin bolady. Bul avtobýstar qaıtalama lızıngke beriletin bolady, ıaǵnı bul avtobýstar «Semey Bus» JShS oryndalmaǵan mindettemelerin ózine alatyn kompanııaǵa ótedi», dep túsindirdi Dmıtrıı Garıkov.
Qala ákimdigi bolashaqta jasyl avtobýstar qaıtadan júre bastaıtynyn jáne valıdatorlar men kólik kartalaryna qyzmet kórsetý úshin jańa kompanııa tartylatynyn rastady. Qazirgi tasymaldaýshynyń avtobýstarynda qolma-qol tólem júrgizilýde.
Aıta ketsek, «Semey Bus» JShS memlekettik-jeke menshik áriptestik negizinde qurylǵan. Kólik kompanııasynyń qaryzyna baılanysty semeılikter avtobýssyz qalýy múmkin ekendigi aǵymdaǵy jyldyń sáýir aıynyń basynda belgili boldy. «QDB-Lızıng» AQ iri nesıelik boryshy úshin «Semey Bus»-qa defolt jarııalap, lızıng zatyn – 170 avtobýsty alyp qoıý nıetin bildirdi. 16 sáýirde Semeı ákimdigi bul kompanııamen kelisimshartty buzdy. Alaıda ol kólikti óz erkimen berýden bas tartyp, jumysyn jalǵastyra berdi. Qalada taǵy bir tasymaldaýshy – «Semavtopark» JShS paıda bolyp, ákimdik onymen shart jasasty. 16 maýsymda «Semey Bus» júrgizýshileri turǵyndardyń nazaryn avtopark problemalaryna aýdarý úshin ereýilge shyqty. Ákimdik ókilderimen júrgizilgen kelissózderden keıin olar jumysyn qaıta bastady. Alaıda, 22 maýsymda júrgizýshiler taǵy da ereýilge shyǵyp, sodan beri jelige shyqpady. Qala turǵyndary qoǵamdyq kóliktiń jumysyna shaǵymdana bastaǵan. Sol kezde taksı qyzmetterine suranys kóbeıip, baǵalary da kúrt qymbattady.
