Oblystyq juqpaly aýrýlar aýrýhanasynyń bas dárigeri Aına Muhambetovanyń aıtýynsha, emdeý ornynda 120 naýqas qaterli indetke qarsy em qabyldaýda. Onyń 8-i jan saqtaý bóliminde jatyr. Al 120 naýqastyń 11-i bala, onyń 5-i bir jasqa tolmaǵan sábıler. Otbasymen birge aýrýhanaǵa jatqyzylǵan naýqastar da bar.
«О́ńirde jaqynda Úndistanda kóp kezdesip jatqan «Delta» shtamy tirkeldi. Bul naýqastarda ókpe aýrýlaryna tán emes ózge de klınıkalyq belgiler bar. Jaz aıy bolǵan soń, ýlaný, ushyný derekterine nemquraıly qaramaý qajet. Jedel ishek aýrýy sekildi loqsý, júrek aıný, ish ótý, býyndardyń aýrýy, dene qyzýynyń túspeýi, súıekterdiń syrqyraýy tárizdi klınıkalyq belgiler anyqtalsa, jedel medısınalyq kómekke júginý qajet. Sebebi, «delta» shtamm vırýsynyń juǵý jyldamdyǵy joǵary. Klınıkalyq belgisi 3-5 kúnde anyqtalýda.
Aýrýhanaǵa túsken naýqastarda alǵashqy kúnderi ókpesi taza, qyzýy, demikpe joq. Dese de 2-3 kúnde entigý paıda bolyp, tynys alýy qıyndaıdy. Sondyqtan olar jedel túrde jan saqtaý bólimine jatqyzylýda. Aıta ketý kerek, byltyrǵy jyly aýrýdyń jasy 60-65 jastan joǵary bolsa, bıyl ol jasaryp keledi. 40-60 jas arasynda, tipti balalar da vırýs juqtyrǵan», deıdi A. Muhambetova.
Onyń aıtýynsha, aýrý belgisi eń aldymen júrekke áser etedi. Qant dıabeti, qan qysymy bar jandarda óte aýyr jaǵdaıda ótýde.
