Senatorlar áskerı bólimderdiń jeke quramymen kezdesip, áskerı qyzmetshilerdiń materıaldyq-tehnıkalyq jabdyqtalýymen jáne tynys-tirshiligimen tanysty. Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed bólimshelerdiń joǵary deńgeıdegi jaýyngerlik daıyndyǵy men zamanaýı tehnıkalyq quraldarmen jabdyqtalǵanyn atap ótti.
Depýtattar sonymen qatar «Áskerı qyzmet jáne áskerı qyzmetshilerdiń mártebesi týraly» zańdy iske asyrý, onyń ishinde áskerı qyzmetshilerdi áleýmettik jáne materıaldyq-tehnıkalyq qamtamasyz etýge baılanysty máselelerdi talqylady.
Parlamentshiler tótenshe jaǵdaılar saldarynan zardap shekken adamdarǵa medısınalyq jáne psıhologııalyq kómek kórsetý mindetteri júk-telgen TJM Apattar medısınasy ortalyǵynyń qyzmetimen de tanysty.
«Kásibı medısınalyq avarııalyq-qutqarý qyzmetin damytý qajet. Qaza bolǵandar sanyn azaıtýda ol asa mańyzdy», dedi senator Qaırat Qojamjarov.
Senattyń salalyq komıteti tóraǵasynyń óńirlerge sapary Almaty qalasyndaǵy mashına jasaý kásiporyndarynda jalǵasty.
Muhtar Qul-Muhammedke qarý-jaraq pen áskerı maqsattaǵy taýarlardy shyǵarýǵa baǵyttalǵan kásiporyndardyń óndiristik qýaty kórsetildi.
Áńgime barysynda «Qorǵanys ónerkásibi jáne memlekettik qorǵanystyq tapsyrys týraly» zańdy iske asyrýǵa, atap aıtqanda, baǵa belgileýge, jergiliktilendirý deńgeıin arttyrýǵa, qorǵanystyq tapsyrys aıasynda uzaqmerzimdi sharttar jasasýǵa, sondaı-aq kásiporyndardyń borysh júktemesin tómendetý men qarjy resýrstarynyń qoljetimdiligine baılanysty máseleler kóterildi.
«Saladaǵy problemalardy júıeli túrde sheshý qajet. Bir jaǵynan, otandyq kásiporyndarǵa qoldaý kórsetý kerek, ekinshi jaǵynan, áskerı bólimshelerdiń qajettilikterin qazirgi zamanǵy ári shyn máninde suranysqa ıe qarý-jaraq pen áskerı tehnıkamen barynsha qanaǵattandyrý qajet», dedi Muhtar Qul-Muhammed.
Senatorlar Olga Perepechına men Erik Sultanov Soltústik Qazaqstan oblysy Aqqaıyń aýdanynyń fermerlerimen kezdesý barysynda sútti mal sharýashylyǵyn damytýdyń keleshegi týraly aıtty.
Depýtattar sondaı-aq aýyl sharýashylyǵyn odan ári jańǵyrtý jáne sıfrlandyrýdyń mańyzyn atap ótti. Depýtattar sút-taýar fermasynyń jumysyndaǵy osy ádisterdiń nátıjelerimen tanysty. 1600 bas iri qaraǵa eseptelgen bul keshen saladaǵy iri jobalardyń biri bolyp sanalady.
Aýyldy damytý úshin zamanaýı tehnologııalardy engizýmen qatar, kadr tapshylyǵy problemasyn sheshý de mańyzdy. «Eńbek» memlekettik baǵdarlamasy aýyl turǵyndaryn eńbek kúshi tapshy óńirlerge kóshirýge baǵyttalyp otyr. Olga Perepechına men Erik Sultanov Astrahanka aýylynda elimizdiń ońtústik óńirlerinen osy jaqqa kóship kelgen azamattarǵa qandaı jaǵdaı jasalǵanyn bildi.
«Bul baǵdarlama elimizdiń soltústik aımaqtarynan halyqtyń ketýin azaıtýǵa múmkindik beredi jáne óńirdiń adam resýrstary men kadrlyq áleýeti jaqsartatyn bolady. Soltústik Qazaqstan oblysyn damytýdyń keshendi josparyna engizilýi osy jumystyń erekshe mańyzyn kórsetip otyr», dedi Erik Sultanov.
Senatorlar sondaı-aq Qyzyljar aýdany Chapaev aýylyndaǵy 720 bas sımmental asyl tuqymdy malǵa arnalǵan sút-taýarly kesheninde boldy. Keshen dırektory depýtattardy agrokásiporyn jumysynyń qurylymymen jáne negizgi óndiristik-sharýashylyq kórsetkishterimen tanystyrdy.
«Qazirgi ýaqytta memleket sharýalarǵa qoldaý kórsetýde. О́ńirde sútti mal sharýashylyǵyn damytý jóninde baǵdarlamalar tabysty jumys isteýde. Aldaǵy ýaqytta memlekettik qoldaý men jeke ınvestısııalar esebinen salany qarjylandyrý ulǵaıady dep oılaımyn», dep atap ótti Erik Sultanov.
Senat depýtattary Altynbek Nuhuly men Nurjan Nursıpatov Shyǵys Qazaqstan oblysyna sapary aıasynda Semeı qalasynda pedagogıkalyq kolledj oqytýshylarymen kezdesti.
Depýtattar muǵalimderdiń suraqtaryna jaýap berip, olarǵa qashyqtan oqytýdy zańnamalyq qamtamasyz etýge qatysty jaqynda senatorlar qabyldaǵan zańnyń erejelerin túsindirdi.
«Túzetýler «qashyqtan oqytý» uǵymyn naqtylaıdy jáne ony ótkizý tártibin belgilegen. Sondaı-aq oqýlyqtardy sapaly daıyndaýdyń jekelegen erejeleri engizildi», dedi senator Altynbek Nuhuly.
Senator Nurjan Nursıpatov sessııa barysynda atqarylǵan jumystar týraly aıta kelip, ınklıýzıvti bilim berý týraly qabyldanǵan zańnyń jańalyqtaryna jan-jaqty toqtaldy.
«Zańda ınklıýzıvti jáne arnaıy bilim berýdiń normatıvtik quqyqtyq bazasyn jetildirý, sondaı-aq elimizdiń zańnamasyn Adam quqyqtarynyń jalpyǵa birdeı deklarasııasy jáne Múgedekterdiń quqyqtary týraly konvensııa qaǵıdattaryna sáıkes keltirý jónindegi mindetter sheshilgen», dedi ol.
Senatorlardyń Pavlodar oblysy prokýratýrasynyń basshylyǵymen kezdesýi barysynda Palatanyń aǵymdaǵy jylǵy zań shyǵarý qyzmeti týraly sóz boldy. Qylmystyq proseske, quqyq qorǵaý qyzmetine jáne saılaýǵa baılanysty zańnamaǵa engizilgen túzetýlerge erekshe nazar aýdaryldy.
