Bul týraly Qyzylorda oblysy kásipkerler palatasynyń dırektory Ǵalymbek Jaqsylyqov málimdedi.
«Qazir elimizde epıdemıologııalyq jaǵdaı kúrdeli bolyp jatqany belgili. Qyzylorda oblysy «sary» aımaqta tur. О́ńirde karantındik shekteýler bolsa da kásipkerlerdiń jumys jasaýyna barynsha múmkindik jasalǵan. Elimizde qoldanysqa engizilgen «Ashyq» jobasy boıynsha oblysta 294 kásipkerlik nysannyń ótinishi negizinde olarǵa arnaıy QR kod berilgen. Osy oraıda kásipkerler qoıylǵan talaptardy tolyq oryndaýy tıis. Dese de keıbir kemshilikterge jol bergen 17 kásipkerlik nysannyń QR kody deaktıvasııalandy. Sebebi kásipkerler kelýshilerdiń mártebesin teksermegen. Sol úshin olar ázirge 2 aptaǵa jobadan shettetildi», dedi palata dırektory.
Onyń aıtýynsha, jumys algorıtmin 3 ret buzǵan qatysýshy 2 aıdan erte jobaǵa qaıta orala almaıdy. Ol monıtorıng toby usynǵan málimet boıynsha júzege asady. Búginde óńirde 294 nysannyń ishinde 22-si komıssııa sheshimimen «kóshbasshy» mártebesin alǵan. Bul mártebe kásipkerlik nysannyń qyzmetin kelýshiler tarapynan turaqty chekın (joba aıasynda kelýshilerdiń statýsyn tekserý) jasalǵandyqtan berilgen.
