«XXXII Jazǵy Olımpıada oıyndarynyń translıasııasyna qatysty kórermender men áriptesterimizden kelip túsip jatqan saýaldarǵa baılanysty kelesini habarlaımyz. Tokıo Olımpıadasynyń tikeleı translıasııalaý quqyǵy «Dentsu Inc.» kompanııasyna tıesili. «Qazaqstan» teleradıokorporasııasy men «Habar» agenttigi» AQ Qazaqstan, Qazsport, «Habar» telearnalary arqyly Jazǵy Olımpıadany el aýmaǵynda kórsetý boıynsha kelissózderdi 2019 jyly bastaǵan bolatyn. Taraptar ázirge ortaq kelisimge kele alǵan joq. Ekijaqty kelisimniń uzaqqa sozylý sebebi, quqyq ıesiniń lısenzııa baǵasyn 2016 jáne 2018 jyldardaǵy Olımpıada oıyndarymen salystyrǵanda 123 paıyzǵa qymbatqa usynýy», dep jazylǵan habarlamada.
Teleradıokorporasııa málimdegendeı, qazirgi kezde Qazaqstan, Qazsport, «Habar» telearnalary qazaqstandyq sportshylardy qoldaý jáne otandyq kórermenderge Olımpıadadan jedel aqparat usyný boıynsha jan-jaqty jumys júrgizip jatyr.
«Telearnalardyń Ulttyq Olımpıada komıteti men sheteldik iri aqparat agenttikterinen foto,-vıdeomaterıaldar alý múmkindigi qarastyrylǵan», delingen habarlamada.
Aıta ketsek, 23 shilde men 8 tamyz aralyǵynda Japonııa astanasynda XXXII Jazǵy Olımpıada oıyndary ótedi. Bul jolǵy Olımpıadaǵa kórermender qatyspaıdy. Qazaqstan quramasynda sporttyń 27 túrinen 96 joldama bar.
