Damý jospary jańa jobalarǵa jol ashty

Kórshi memlekettermen shekara jabylǵanda birinshi qajettilikti qamtamasyz etetin taýarlardyń baǵasy aspandap shyǵa keldi. Osyndaı sátte óńir ekonomıkasyna júrgizilgen taldaý oblysqa azyq-túlik taýarlarynyń 95 paıyzy syrttan keletinin kórsetti.

Irkilistiń silkiniske sebep bolary ras eken. Syrttan keletin ónimge táýeldi oblys­ty 2023 jylǵa deıin ekonomıkalyq damytý jospary qabyldanyp, sonyń nátıjesinde birshama bıznes qurylymdary memleket qoldaýyna ıe boldy. Búginde óńirde jalpy quny 8,6 mlrd teńgeni quraıtyn 145 joba iske júzege asty.

– Damý jospary oblys turǵyndaryn birinshi qajettiliktegi taýarlarmen qam­ta­ma­syz etýdi kózdeıdi. Jańaǵy júzdegen joba­nyń ishinde ónimi ekologııalyq jaǵy­nan taza jáne sapaly kásiporyn kóp. Tamaq ónerkásibinde qoı, sıyr, jylqy etinen konserviler, jartylaı fabrıkattar, 16 túrli shujyq ónimderi, makaron ónimderi, sondaı-aq asqabaq sýsyny men shokolad óndiristeri iske qosyldy. Sonymen birge, qurylys salasynda birqatar materıaldyń óndiristeri, sabyn jáne antıseptık shyǵaratyn kásiporyndar bar, – deıdi oblystyq kásipkerlik jáne týrızm basqarmasynyń basshysy Ferdoýsı Qojabergenov.

Jalpy bıyl «Bıznestiń jol kartasy – 2025», «Eńbek» memlekettik baǵdarlamalary aıasynda, sondaı-aq «Qyzylorda» óńirlik ınvestısııalyq ortalyǵy arqyly shaǵyn jáne orta bıznesti qarjylandyrýǵa oblys­tyq jáne respýblıkalyq bıýdjetten 10 mlrd teńgeden astam qarjy bólindi. «Jumys­pen qamtý jol kartasy» baǵdarlamasy aıasynda 6 paıyzben nesıelendirý engizilip, Úkimet sheshimimen oblysqa 1 mlrd teńge qarastyrylǵan. Búginde aımaqtaǵy sha­ǵyn jáne orta bıznestiń 1 600-ge jýyq jobasyna 15,5 mlrd teńge nesıe berildi.

Budan bólek, kásipkerlerdi qoldaý maq­satynda «Qyzylorda» óńirlik ınves­tı­sııalyq ortalyǵyna oblystyq bıýdjetten qosymsha 400 mln teńge qarjy qarastyrylyp otyr. Bul qarajat oblysta óńdeý ónerkásibi salasyna jyldyq 2 paıyzben 4 jylǵa jeńildetilgen nesıe túrinde beriletin bolady. Osy saladaǵy taǵy bir jańalyq – tamaq ónerkásibi salasyndaǵy jańa jobalardy júzege asyrý úshin Qyzylorda qalasynda «Arnaıy ekonomıkalyq aımaq qurý» qolǵa alynbaq. Jańa bastamany jandandyrý úshin munaı servısi salasyndaǵy jergilikti ınvestorlar 5 mlrd teńge salýǵa daıyn. Búginde bul arnaıy aımaqty qurýǵa Úkimettiń tujy­rymdamalyq maquldamasy alyndy.

 Bıyl Memleket basshysy Úkimetke baǵ­darlamalardyń qarjylandyrý tetikterin qaıta qarastyrýdy jáne mıkroqarjy uıym­darynyń baǵdarlamalarǵa belsendi qaty­sýyn qamtamasyz etýdi tapsyrdy. Soǵan sáıkes ­oblys ákimdigi «Atameken» kásipkerler palatasymen birlesip, jańa mıkroqarjy uıymyn qurý ústinde. Alda bul uıym «Qyzylorda» óńirlik ınvestısııalyq ortalyǵy sekildi memlekettik baǵdarlamalarǵa qatysyp, aýyl kásipkerlerin qarjylandyrý saıasatyn iske asyratyn bolady.

Indetke baılanysty shekteý sharalary toıhanalardyń qyzmetine tusaý salǵany belgili. Oblystyń 2023 jylǵa deıingi damý josparynda bıznestiń osy túrin basqa salalarǵa baǵyttaýǵa basa mán berilgen.

Toıhana qyzmetin kásiptiń ózge salasyna beıimdeýge nıet bildirgen kásipkerlerge «Bıznestiń jol kartasy – 2025», «Qarapaıym zattar ekonomıkasy» memlekettik baǵdar­lamalary jáne «Qyzylorda» óńirlik ınves­tısııalyq ortalyǵy arqyly jan-jaqty qoldaýlar kórsetilip otyr.

Búginde oblysta tirkelgen 128 toıhana­nyń 22-si qyzmetin ózge salalarǵa baǵyt­taǵan. Mysaly, Aral aýdanynda orna­las­qan «Aqnıet», «Almaz», «Han Sha­tyr» toıhanalary saýda oryndaryna jáne «Nur­sultan» toıhanasy shaǵyn naý­baıhanaǵa aınalsa, Qazalydaǵy «Orda», «Alataý», RR, «Aqtilek», «Tileýles» toıhanalary qoǵamdyq tamaqtaný nysandary retinde kelý­shilerge qyzmet kórsete bastady. Qarmaqshy aýdanyndaǵy «Málıke Ana» toıhanasy balalar oıyn alańy men kondıterlik ónimder sehyna, «Aqtilek» toıhanasy tigin sheberha­nasyna, Jalaǵashtaǵy «Bereke» toıhanasy nysany sport keshenine aınalyp shyǵa keldi. Keıbir toıhana ıeleri mal, qus sharýa­shylyǵymen aınalysýǵa den qoıdy.

– Búginde kásippen aınalysamyn degen azamattarǵa túrli memlekettik jáne óńirlik baǵdarlamalar arqyly qoldaý jasalyp otyr. Sonyń negizinde óńir kásipkerlerine jeńildetilgen paıyzben nesıelerge, qaıta­rymsyz granttarǵa ózge de túrli qoldaý sharalaryna qol jetkizýge múmkindikter jeter­­lik. Odan bólek, «Bir tereze» qaǵıdaty negizin­de qyzmet kórsetetin «Bızneske arnalǵan úkimet» platformasy bıznes jospar ázirleý, baǵ­darlamalarǵa qatysý barysynda barynsha kómek kórsetedi, – deıdi basqarma basshysy.

Qyzylorda