Bıyl 71 nysanda kúrdeli jóndeý jumystary atqarylyp, mejelengen jumystardyń 80 paıyzy oryndalǵan. Ortasha jóndeý jumystary jalpy uzyndyǵy 200 shaqyrymnan asatyn 160 kósheni qamtıdy. Birinshi jartyjyldyqta jóndeý jumystary 66 kóshede aıaqtaldy.
Joldardyń ahýalyn taldaǵan qala ákimi Murat Áıtenov, jol salý barysynda ınjenerlik jeliler qudyqtary jol betimen bir deńgeıde bolýy kerektigine nazar aýdardy. Joldardy kúrdeli jóndeýden ótkizýge ketetin shyǵyn jańa joldar salýǵa jumsalatyn qarjymen birdeı bolatynyn atap, kúrdeli jóndeýden ótkizilgen joldardyń sanaty artatynyn, olardyń júk kóterý qabileti jaqsara túsetinin aıtyp ótti. Qurylystyń tehnıkalyq erekshelikteri jóninde turǵyndarǵa aqparat berýde júıeli jumystar atqarýdy tapsyrdy.
Qala basshysy Respýblıka dańǵyly qalanyń negizgi kólik magıstraliniń biri ekendigin atap ótti. Qazirgi tańda trassa boıymen júrgizilgen ınjenerlik jeliler qudyqtaryn jol betimen birdeı deńgeıge kóterý jumystary atqarylǵan. Jol tańbalaryn syzýda qalanyń aýa raıyna shydaı beretin sýyq plastık tehnologııasy qoldanylmaq. Dańǵyl boıyndaǵy aıaqjoldarǵa brýschatka tóseýde byryńǵaı tártipti ustaný tapsyrylyp, qalanyń basty transporttyq kúretamyry sanalatyn avtojoldy tez arada bitirý jóninde naqty mindet qoıyldy.
Bıyl 157 shaqyrym bolatyn joldarǵa shaǵal tas tóseý jumystary josparlanǵan. Oǵan qosymsha ınjenerlik ınfraqurylym tartylǵan aýmaqtardyń da kósheleri qosylyp otyr.
Mundaı jumys ádisi durys emes ekendigin nazarǵa alǵan Murat Áıtenov, qala ákimdiginiń salalyq basqarmalaryna jer qazý jumystaryn atqarǵan merdiger uıymdar, ózderi buzǵan joldardy qalpyna keltirýi tıis degen talapty qujat júzinde bekitýdi tapsyrdy. Jol jabyndylarynyń normatıvterge saı nyǵyzdalýyn qadaǵalaýdy júktep, qajet bolǵan jaǵdaıda joldyń nyǵyzdylyq deńgeıine zerthanalyq ádispen baqylaý uıymdastyrýdy tapsyrdy. Eń bastysy, turǵyndar laı keship, zardap shekpeýi tıis ekenin qatań túrde eskertti.
