Tártip saqshylarynyń málimetinshe, ol juqpaly aýrýlar aýrýhanasynda sanıtarlardyń jumys oryndaryn usynǵan. Qyzmet quny 150 den 400 myń teńgege deıin boldy. Adamdar jumys oryndaryn satyp alý úshin nesıe alyp, aqsha bergen. Alaıda, alaıaqtyń quryǵyna túsip, ýádelengen jumys oryndaryn ala almaǵan.
«Men jaqsy jalaqysy bar jumys izdedim. Tanystar maǵan tıisti bos jumys orny týraly aıta bastady. Janara maǵan habarlasyp, 150 myń teńge tóleý kerektigin aıtty. Bul aqshany men paıyzben qaryzǵa aldym. Ol aqshany alyp, bergen ýádelerin oryndamady. Endi aqsha da, jumys ta joq», dedi Oral qalasynyń turǵyny Raıa Ismaǵulova.
Alaıaqtyń aıtýynsha, barlyǵy 16 shildeden bastap jumysqa shyǵýy kerek edi. Zardap shekkender bul shemanyń artynda juqpaly aýrýlar aýrýhanasy qyzmetkerleriniń biri tur dep sanaıdy. Biraq mekeme dırektory buny joqqa shyǵardy.
«Biz aryz jazdyq. IID bizge eshkimge shyǵyn keltirilmegenin, aqsha qaıtarylǵanyn habarlady», dedi Oblystyq juqpaly aýrýlar aýrýhanasynyń dırektory Nadııa Ahmetova.
Atalǵan oqıǵa boıynsha polısııaǵa barlyǵy 70 ótinish kelip túsken. 1991 jyly týǵan azamatsha alaıaqtyq jasaǵany úshin ustaldy. Polısııa onyń osyndaı 30 faktige qatysy baryn anyqtady. QR QK-niń 190-baby, 3-bóligi «Alaıaqtyq» boıynsha sotqa deıingi tergeý júrgizilýde.
