О́tinimderdi qabyldaý 10-23 tamyz aralyǵynda https://qazinn.kz/ portalynda júzege asyrylady. Bul rette qanatqaqty jobanyń qorytyndysy boıynsha tehnologııalardy kommersııalaýǵa arnalǵan ınnovasııalyq granttar berý qaǵıdalary qaıta qaralyp, ózgertiletinin aıta ketken jón.
Baıqaýǵa qatysý úshin akselerasııalyq baǵdarlamalardan sátti ótkeni týraly sertıfıkattyń bolýy qajet. Sonymen qatar budan bylaı ekinshi jáne úshinshi satyǵa irikteý konkýrsyna jiberý úshin birinshi satydan ótý qajetti shart sanalady.
«Sondaı-aq qarjylandyrý sharttary da ózgertildi. Aıtalyq, birinshi satyny iske asyrýǵa arnalǵan ınnovasııalyq granttyń shekti somasy 20 mln teńge jáne iske asyrý merzimi 6 aıdan aspaýy tıis. Ekinshi jáne úshinshi satylarǵa qarastyrylǵan ınnovasııalyq granttyń kólemi 80 mln teńge, iske asyrý merzimi 12 jáne 9 aıdy quraıdy. Úmitkerlerge qolaıly bolý úshin únemi Community QazInnovations keńes berý Telegram arnasy jumys isteıdi», dedi baıqaýdyń uıymdastyrýshylary.
Buǵan qosa ár dúısenbi, sársenbi jáne juma kúnderi túsindirý men keńes berý jumystaryn júzege asyryp, keri baılanys ornatý maqsatynda ZOOM alańynda onlaın konferensııalar ótkiziledi. Eskerte ketetin jaıt, ótinim berýshi granttyq qarjylandyrý jónindegi Keńestiń múshelerimen, sondaı-aq baıqaý operatorynyń qyzmetkerlerimen aýyzsha, jazbasha, telefon arqyly sóılesýge jáne resmı konsýltasııalyq keńesti qospaǵanda baılanys jasaýǵa quqyǵy joq. Mundaı áreket grant berý jónindegi sheshimge yqpal etý talpynysy retinde baǵalanady. Eger osyndaı áreket anyqtalsa, ótinish berýshiniń jobasy konkýrstan shyǵarylyp, jaýapsyz qatysýshylar tizimine engizilip, operatordyń saıtynda jarııalanady.
