«Samuryq-Energo» AQ taratqan resmı málimetke súıensek, qaıta jańartylǵan energoblok 2023 jyldyń jeltoqsanynda paıdalanýǵa berilip, iske qosylady.
Jalpy, «Samuryq-Energo» bul jobaǵa erekshe mán berip otyr. Sebebi ony oıdaǵydaı júzege asyrý kompanııanyń ózge de energetıkalyq nysandarynda júrgizilip jatqan jumystar sekildi salada oryn alyp otyrǵan elektr qýatynyń tapshylyǵyn azaıtýǵa jáne eldiń energetıkalyq qaýipsizdigin arttyrýǵa múmkindik beredi. Bul rette sońǵy tórt jylda (2017-2020 jyldar aralyǵynda) respýblıkada elektr tutynýdyń ortasha ósimi 4 paıyzdy qurady. Jyl saıyn elektr qýatyna degen qajettilik shamamen 600 MVt-qa ósip otyr.
Mamandar qolda bar qýat rezervteriniń azaıyp bara jatqandyǵyn alǵa tartýda. Elektr qýatynyń boljamdy teńgerimi Qazaqstanda 2023 jyldan bastap óndiristik qýat tapshylyǵy bolatynyn kórsetip otyr. Al retteý qýatynyń tapshylyǵy qazirdiń ózinde baıqalýda.
Júıelik operatordyń aqparatyna súıensek, 2020-2021 jyldary kúzgi-qysqy kezeńnen ótý barysynda Birtutas elektr energetıkalyq júıeniń jumys qýatyna qatysty naqty rezerv 600 MVt-ty qurady. Saladaǵy sarapshylar aǵymdaǵy qarqyn saqtalǵan jaǵdaıda, kelesi jylytý kezeńinde Birtutas elektr energetıkalyq júıeniń qýat rezervteri bolmaı qalýy múmkin ekenin, bul elektrmen jabdyqtaýdaǵy shekteýlerge ákep soqtyratynyn aıtyp dabyl qaǵýda.
Jańa elektr súzgilerin ornata otyryp, №1 energoblogty qalpyna keltirý jobasy stansanyń qýatyn 4000 MVt-qa deıin arttyrýǵa múmkindik bermek. Sonyń nátıjesinde, stansada uzaq jyldar boıy júrgizilip kele jatqan negizgi jabdyqtardy jańǵyrtý prosesi oıdaǵydaı aıaqtalmaq.
Esterińizge sala keteıik, 2014 jyly qýaty 500 MVt bolatyn №2 energoblok jelige qosyldy. Bul Ekibastuz GRES-1 nysanynyń óndiristik kórsetkishterin aıtarlyqtaı arttyrýǵa jol ashty. Buǵan deıin 2012 jyldyń shildesinde qýaty 500 MVt bolatyn №8 energoblok iske qosylǵan bolatyn.
«Samuryq-Energo» AQ elektr qýatynyń boljamdy tapshylyǵyn azaıtý úshin GRES-1 stansasynyń №1 energoblogyn qalpyna keltirýden bólek, taǵy da basqa jobalardy iske asyrýdy josparlap otyr. Atap aıtqanda, Ekibastuz GRES-2 stansasynyń qýaty 636 MVt bolatyn úshinshi energoblogyn paıdalanýǵa berý, 2028 jyldan 2035 jylǵa deıingi aralyqta Ekibastuz GRES-1 stansasynyń jıyntyq qýatyn 240 MVt-qa arttyrý maqsatynda 3, 4, 5, 6, 7, 8 bloktardy kezekpen qaıta jańartý mindeti tur.
Sondaı-aq «Almaty elektr stansııalary» AQ-ǵa qarasty Almaty JEO-3 nysanynyń belgilengen qýatyn 450 MVt-qa deıin ulǵaıtyp ári manevrlik rejimdi qamtamasyz ete otyryp, qaıta jańartý kózdelgen. Budan bólek, Almaty JEO-1 qaıta qurý, qýatyn 250 MVt-qa deıin arttyrý jáne 2030 jylǵa deıin manevr jasaý múmkindigin týdyrý da qarastyrylǵan.
Sonymen qatar 2026 jyly Qapshaǵaı GES-inde qýatty retteý dıapazonyn 300 MVt-qa deıin ulǵaıtýdy qamtamasyz etetin, qýaty 40 MVt bolatyn Kerbulaq GES-in paıdalanýǵa berý josparlanýda. Shelek dálizinde óńirdiń jel jáne sý áleýetin ıgerý jobalaryn damytý kózdelip otyr.
B.Nurjanov atyndaǵy Ekibastuz GRES-1 – árqaısysynyń qýaty 500 MVt bolatyn segiz energoblokpen jabdyqtalǵan, belgilengen qýaty 4000 MVt-ty quraıtyn Qazaqstandaǵy eń iri jylý elektr stansasy. Stansa respýblıka boıynsha barlyq elektr tutyný kóleminiń 20-23 paıyzyn qamtamasyz etedi. Stansanyń ıesi – «Samuryq-Energo» AQ.
