«Sarapshylar statıstıkalyq derekter men modeldeý negizinde 2030 jylǵa qaraı jumys kúshiniń sany 9,7 mıllıon adamǵa jetedi, 2040 jyly bul kórsetkish 10,7 mıllıondy quraıdy, al 2050 jylǵa qaraı jumys kúshi 11,4 mıllıonǵa deıin ósedi dep esepteıdi», dep jazady QR EHÁQM baspasóz qyzmeti.
Boljamnyń negizgi ssenarııi boıynsha 2030 jylǵa qaraı el halqy shamamen 20,7 mıllıon adamdy quraıdy, 2040 jylǵa qaraı bul kórsetkish 22,9 mıllıon adamǵa deıin, al 2050 jylǵa qaraı 25,5 mıllıon adamǵa deıin ósedi dep kútilýde.
«Boljamǵa sáıkes, 2030 jylǵa qaraı týýdyń joǵary deńgeıi men halyqtyń qartaıýyna baılanysty jumys kúshiniń halyqqa paıyzdyq qatynasy 46,7%-ǵa deıin tómendeıdi. Bul ekonomıkalyq belsendi halyqqa júkteme artady degendi bildiredi», deıdi MDM boljamdaý departamentiniń dırektory Dmıtrıı Shýmekov.
Turǵyndar sanynyń eń kóp ósýi Respýblıkalyq mańyzy bar qalalarda kútiledi: Nur-Sultan - 2,7 ese (1,9 mıllıonǵa), Almaty - 1,8 ese (1,6 mıllıonǵa) jáne Shymkent - 2,4 ese (1,5 mıllıonǵa).
Budan basqa, Mańǵystaý oblysynyń halqy eki esege (1,4 mıllıon adamǵa deıin), 500 myńǵa - Túrkistan (2,5 mıllıonǵa deıin), 700 myńǵa - Almaty (2,8 mıllıonǵa deıin) ósedi.
Aǵymdaǵy týý, ólim-jitim jáne kóshi-qon koeffısıentteri kezinde Shyǵys Qazaqstan, Qaraǵandy, Qostanaı, Soltústik Qazaqstan, Pavlodar jáne Aqmola oblystarynda halyq sanynyń birtindep tómendeýi baıqalatyn bolady. Alaıda, eger kórsetilgen óńirlerde týýdyń jıyntyq koeffısıenti ýaqyt óte kele aıtarlyqtaı ósse jáne emıgrasııa tómendese, atalǵan óńirlerdiń halyq sany turaqtanýy múmkin.
Jalpy, 2050 jylǵa deıingi uzaq merzimdi demografııalyq boljam mynadaı baǵyttar boıynsha jasaldy: halyqtyń jalpy sany, halyqtyń jas quramy, 2050 jylǵa qaraı ssenarııler boıynsha jas quramyndaǵy aıyrmashylyqtar, óńirlik sáıkessizdikter, óńirler boıynsha halyq sany, demografııalyq dınamıka, jumys kúshiniń sany, jumys kúshiniń qurylymy men ortasha jasy, onyń óńirlik sáıkessizdikteri, óńirler boıynsha bólý.
Budan basqa, budan ári 2021 jylǵy demografııalyq kórsetkishterdiń naqty ózgeristeri negizinde (halyq sanaǵyn eskere otyryp) osy boljamǵa túzetý júrgizý josparlanýda.
«Boljam tórt quramdas bóliktiń negizinde qurylǵan: halyqtyń bastapqy naqty sany, týý, ólim-jitim jáne halyqtyń kóshi-qon qozǵalysy», dep túsindirdi Dmıtrıı Shýmekov.
