Qazaqstandyq komandalar arasynda eń birinshi bolyp Eýrokýbok oıyndarynyń toptyq kezeńine shyqqan «Shahter» araǵa jeti jyl salyp sol jetistigin qaıtalaýǵa jaqyn tur. 2012 jyly el chempıony atanyp, bir jyldan keıin Qazaqstan kýbogy men Sýperkýbogyn jeńip alǵan qaraǵandylyqtar 2013/14 jylǵy Eýrododa básekesinde jaqsy nátıjege qol jetkizgenin jankúıerler jaqsy biledi. Keıinnen quldılaý kezeńin bastan ótkergen «kenshiler» byltyrdan bastap óz qoldaýshylaryn táýir oıynymen qýantyp keledi. Degenmen komandaǵa áli de turaqtylyq jetispeıdi. El birinshiliginde ala-qula oıyn kórsetip júrgen qaraǵandylyqtar qazirgi tańda týrnır kestesinde 19 upaımen 11-orynda tur. Dese de «Shahterdiń» Konferensııa lıgasynyń pleı-off kezeńine deıin jetýi – klýb úshin tamasha nátıje. Árıne, qaraǵandylyq klýb bul nátıjemen shektelip qalmaı, toptyq kezeńge de shyǵady degen úmittemiz.
«Shahterdiń» úshinshi kezeńdegi qarsylasy Rýmynııanyń «Stıaýasy» sııaqty tájirıbeli komanda bolmasa da, óz elinde táýir ujym sanalady. Kıev oblysyndaǵy shaǵyn ǵana Kovalıovka aýylynyń komandasy 2012 jyly qurylyp, 2019/2020 jylǵy maýsymnan bastap Ýkraınanyń Premer-lıgasynda óner kórsetip keledi. О́tken maýsymda Ýkraına birinshiliginde 4-orynǵa turaqtap, birden Konferensııa lıgasynyń úshinshi kezeńine joldama alǵan edi.
Eki komanda arasyndaǵy birinshi kezdesý Ýkraınadaǵy 5 myń jankúıerge shaqtalǵan «Kolos» stadıonynda ótip, 0:0 esebimen teń aıaqtalǵany belgili. «Astana Arenadaǵy» qarymta kezdesýde de komandalardyń kúshteri teń boldy. Aıtpaqshy, «Shahter» de «Tobyl» sııaqty óz alańyndaǵy Eýrokýbok matchtaryn elordada ótkizýge májbúr. О́ıtkeni Qaraǵandynyń ortalyq stadıony ÝEFA sertıfıkattaýynan ótken joq.
90 mınýt boıy komandalar bir-biriniń qaqpasynan sańylaý taba almaǵan soń, oıyn ekstra-taımǵa ulasty. 15 mınýttan eki taım oınaǵan fýtbolshylar bul ýaqytta da gol soǵa almady. Negizi 120 mınýtta eki ujymda da gol soǵatyn birneshe múmkindik bolǵan edi. Alaıda shabýylshylar ońtaıly sátte múlt ketip jatty. Sóıtip negizgi jáne qosymsha ýaqyttarda jeńimpaz komanda anyqtalmaǵan soń, fýtbolshylar penaltı tebýge kiristi.
«Stıaýamen» ótken Erevandaǵy matchta qaqpashy Igor Shaskııdiń tamasha oınaǵany esimizde. Bul jolǵy 11 metrlik «lotereıada» da Shaskıı úsh soqqyny qaıtaryp, komandasyn kelesi kezeńge alyp shyqty. Sóıtip «Shahter» qazaqstandyq komandalar arasynda birinshi bolyp Konferensııa lıgasynyń pleı-off kezeńine joldama aldy.
Al «Kolos» qatarynan ekinshi jyl Eýrokýbok básekesin úshinshi irikteý kezeńinen aıaqtaýǵa májbúr boldy. Olar byltyrǵy Eýropa lıgasynyń úshinshi aınalymynda Horvatııanyń «Rıeka» komandasynan jeńilip, jarystan erte shyǵyp qalǵan edi. Endi, mine, bıyl qazaqstandyq komandadan aılasyn asyra almady.
Endi «Shahterdi» alda taǵy eki mańyzdy oıyn kútip tur. Qazirshe jerlesterimizdiń pleı-off satysyndaǵy qarsylasy anyqtalǵan joq. Biraq «kenshilerge» sońǵy aınalymda Slovakııanyń «Spartak» nemese Izraıldiń «Makkabı» klýbynyń biri qarsylas atanýy tıis. Eki ujym arasyndaǵy alǵashqy oıyn Slovakııada ótip, match 0:0 esebimen aıaqtaldy. Qarymta match 12 tamyzda Izraılde ótedi.
