Kórmeniń maqsaty Qazaqstannyń beıneleý óneri men mádenı murasyn kórkemsýret mýzeıi qoryndaǵy týyndylary arqyly nasıhattaý.
Mazmundy is-sharanyń ashylýynda Ulttyq mýzeı dırektorynyń orynbasary Abaı Satybaldın qoǵamnyń damýy men órkendeýi sol eldiń mádenıetine baılanysty ekenin aıta kelip: «Qazir elimizde kórkem óner týyndylaryna aıryqsha kóńil bólinýde. Beıneleý óneriniń keń qanat jaıyp kele jatqany osyǵan dálel bolsa kerek. Egemendik alǵannan beri qazaqstandyq qylqalam sheberleriniń jumystaryna qyzyǵýshylyq artyp keledi. Sol sebepti osy kórmeni uıymdastyryp otyrmyz», dep atap ótti.
Atyraý oblystyq Sh.Sarıev atyndaǵy kórkemsýret jáne qoldanbaly-sándik óner mýzeıiniń basshysy Tólegen Orynbasaruly kórmeniń joǵary deńgeıde ótýine qoldaý bildirgen Ulttyq mýzeı ujymyna alǵysyn aıtyp, murajaı qoryna belgili sýretshi Manarbek Dáýletııardyń «Qyzdar» atty kartınasyn syılady.
Kórmege joǵaryda atalǵan óner mýzeıi qoryndaǵy elimizge tanymal talantty qylqalam sheberleriniń jetpiske jýyq jumysy qoıyldy. Olardyń deni Otandy, týǵan jerdi jáne ulttyq dástúrdi dáripteýge arnalǵan. Ár týyndynyń óz tarıhy bar. Máselen, Mahambet О́temisulyna arnalǵan, aýyl tirshiligin beınelegen eńbekter kelýshilerdiń qyzyǵýshylyǵyn týǵyzdy.
«Egemen-aqparat»
