Kezdesý 12 tamyzda Qazaqstan tarapynyń bastamasy boıynsha ótti.
«Taraptar qyrǵyz-qazaqstan qatynastarynyń saıası, saýda-ekonomıkalyq, mádenı-gýmanıtarlyq, shekara mańy salalaryndaǵy ózekti máseleleriniń keń aýqymyn talqylady. Memleket basshylary arasynda qol jetkizilgen ýaǵdalastyqtardyń júzege asyrylý barysy, sondaı-aq halyqaralyq uıymdar men óńirlik birlestikter sheńberindegi ózara is-qımyl máseleleri jóninde pikir almasty», delingen habarlamada.
Saýda-ekonomıkalyq jáne ınvestısııalyq yntymaqtastyq jelisi boıynsha qos tarap iskerlik keńesti jandandyrý, aýyl sharýashylyǵy óndirýshilerine yńǵaıly bolý úshin shekara mańyndaǵy aýmaqtarda birlesken saýda-logıstıkalyq ortalyqtar qurýdy jedeldetý, sondaı-aq júk tranzıti máselelerin talqyǵa saldy.
«Qyrǵyz tarapy eki eldiń aýmaǵy arqyly azamattar men kólik quraldarynyń erkin qozǵalysy men tranzıti maqsatynda Qyrǵyzstan azamattarynyń Qazaqstanǵa kirýine shekteý sharalaryn alyp tastaý qajettigine erekshe nazar aýdardy», delingen habarlamada.
Kezdesý barysynda Qyrǵyzstan SIM basshysy Rýslan Qazaqbaev azyq-túlik qaýipsizdigin qamtamasyz etý sheńberinde, sondaı-aq koronavırýstyq ınfeksııa pandemııasynyń taralýyna qarsy kúres boıynsha qazaqstandyq tarap kórsetken gýmanıtarlyq kómek úshin alǵysyn bildirdi.
Qazaqstan elshisi Rápil Joshybaev Qazaqstan tarapy granttyq kómek retinde aǵymdaǵy jyly kúzdik bıdaıdyń 1000 tonna joǵary ónimdi tuqymyn berý máselesin pysyqtap jatqanyn habarlady.
