Bıylǵy maýsymnan bastap tusaýy kesilgen sý jańa týrnır – Konferensııa lıgasy atty dop dodasynda óner kórsetken Qostanaıdyń «Tobyly» men elordanyń «Astanasy» irikteýdiń ekinshi aınalymynda Eýropanyń aldyńǵy qatarly komandalaryn jeńip, kelesi kezeńge esh qıyndyqsyz shyqqan bolatyn. Keıingi jerebe jerlesterimizge jeńil túsip, bul joly ózderinen deńgeı jaǵynan bolsyn, qarjylyq jaǵdaıynan bolsyn áldeqaıda tómen klýbtar qarsylas atandy. Osy úshinshi irikteý kezeńiniń jerebesinen keıin qazaqstandyq fýtbol sarapshylary «Tobyl» men «Astananyń» Konferensııa lıgasynyń toptyq kezeńine deıin shyǵatyn múmkindigi bar dep boljaǵan edi. Biraq fýtbolda árqashan sarapshylardyń boljamy durys kele bermeıtinin, alańdaǵy legıonerlerdiń sany, jasy úlken fýtbolshylardyń tájirıbesi, komandanyń qarjylyq áleýeti klýbty árdaıym jeńiske jeteleı bermeıtinin, tek jigerli ári minezdi komandanyń ǵana mereıi ústem bolatynyn «Jılınanyń» jas jigitteri men match sońyna deıin jeńis úshin kúresetin KýPS oıynshylary túsindirip bergendeı boldy.
Eýrokýbok oıyndarynda eshqandaı tájirıbesi joq slovakııalyq 21-22 jastaǵy jigitterden quralǵan «Jılına» Konferensııa lıgasynyń úshinshi irikteý kezeńiniń qarymta matchynda óz alańynda «Tobyldy» qabyldap, qostanaılyq komandany 5:0 esebimen oısyrata jeńdi. 1995-2008 jyldar aralyǵynda uıymdastyrylǵan áıgili Intertoto kýbogynda 2007 jyly top jarǵan «Tobyl» sol ýaqytqa deıin de, odan keıin de birde-bir Eýrokýbok oıyndarynda bulaı masqara bolyp jeńilmegen edi. Tipti ekinshi irikteý kezeńinde syrt alańda Horvatııanyń «Haıdýk» klýbynan 2:0 esebimen jeńilip tura, qarymta machta qarsylastyń qaqpasyna tórt gol soǵyp, «Tobyl» fýtbolshylary erlik kórsetken edi. Al bul joly jas fýtbolshylardyń qarqynyna tótep bere almaı Eýrokýboktaǵy joryǵyn sátsiz aıaqtady.
Sonymen qatar «Tobyldyń» izin ala «Astana» klýby da Konferensııa lıgasynyń úshinshi irikteý kezeńinen keıin atalǵan týrnırmen qoshtasty. Qazaqstandyq komandalar arasynda Eýrokýbok básekelerinde eń tájirıbeli komanda sanalatyn elordalyq ujym osymen qatarynan ekinshi jyl Eýrokýbokty toptyq kezeńsiz aıaqtaýǵa májbúr boldy.
Syrt alańda Fınlıandııanyń KýPS komandasymen teń oınap, «Astana Arenada» anaý-mynaý komandalardan jeńile qoımaıtyn «Astana» qarymta kezdesýde 3:1 esebimen alda turyp, match sońynda 3:4 nátıjesimen utylyp qaldy. Kezdesýdi tamasha bastaǵan «Astana» oıynshylary matchtyń nebári 4-mınýtynda esepti ashty. Marın Tomasovtyń oń qaptaldan asyrǵan pasyn sátti paıdalanǵan Tıgran Barsegıan komandasyn alǵa shyǵardy. Tipti birinshi taım aıaqtalar tusta taǵy sol Tomasovtyń pasynan keıin Abat Aıymbetov baspen tamasha gol soǵyp, esepti eseleı tústi. Sóıtip, «Astana» úziliske kóterińki kóńil-kúımen attandy.
Ekinshi taımda oıynǵa tyńnan qosylǵan KýPS shabýylshysy Rangel 53-mınýtta esep aıyrmasyn qysqartýǵa múmkindik aldy. Biraq arada bes mınýt ótken soń Tıgran Barsegıan alystan tamasha soqqy jasap, komandasynyń úshinshi golyn soqty. Osy goldan keıin «Astana» oıynshylary kelesi kezeńniń máselesi sheshildi dep oılasa kerek, matchtyń qalǵan ýaqytynda tek qorǵanýmen boldy. Alań ıeleri qorǵanysqa mán bere bastaǵan soń qarsylastar shabýylǵa den qoıdy. Sóıtip, oıynnyń 61 jáne 75-mınýttarynda dál sol Rangel eki márte mergendigimen kózge tústi. Al 77-mınýttarynda Ikaýnıek komandasynyń jeńis golyn soǵyp, oıynnyń núktesin qoıdy. Eki matchtyń qorytyndysy boıynsha 5:4 esebimen jeńiske jetken KýPS oıynshylary pleı-off kezeńine joldama aldy.
Osy matchty kórip otyryp 2015/16 jylǵy Chempıondar lıgasynyń irikteý kezeńindegi «Astana» men HIK arasyndaǵy kezdesý esimizge tústi. Úshinshi irikteýdiń syrt alańda ótken alǵashqy oıynynda elordalyq ujym 0:0 esebimen teń oınap, «Astana Arenadaǵy» qarymta kezdesýde jerlesterimiz sońǵy mınýttarda 4:3 nátıjesimen jeńisti julyp alǵan edi. Mine, araǵa alty jyl salyp KýPS dál sondaı jaǵdaımen «Astanany» óz alańynda jeńip qana qoımaı, jerlesteriniń ketken esesin qaıtardy.
Eýropa lıgasynyń úshinshi irikteý kezeńinde «Alashkertten» jeńilgen Almatynyń «Qaıraty» jarysty Konferensııa lıgasynda jalǵastyratyn boldy. Eýrokýbok básekesin Chempıondar lıgasynan bastap, úshinshi deńgeıli jarysqa deıin túsip qalǵan almatylyqtarǵa endi jeńilýge bolmaıdy. О́ıtkeni olardy ári qaraı qabyldap ala beretin ÝEFA-nyń basqa týrnıri joq.
«Shahterge» sáttilik alyp kelgen Erevandaǵy Vazgen Sargsıan atyndaǵy stadıon «Qaıratty» jarylqaı qoımaıdy. Almatyda komandalardyń kúshteri teń túsken soń, barlyq másele syrt alańdaǵy oıynda sheshiletini anyq edi. Sóıtip, óz elinde ótken oıynda armenııalyqtar tóreshimen birge jabylyp júrip áreń degende «Qaıratty» 3:2 esebimen jeńip, kelesi kezeńge joldama aldy.
Jerlesterimizdiń jeńiske jetetindeı múmkindikteri bar edi. Biraq 62 jáne 92-mınýttarda «Qaırattyń» eki birdeı oıynshysy alańnan qýylǵannan keıin almatylyqtardyń saly sýǵa ketti. Alǵash Denıs Polıakov komandalastaryn qıyn jaǵdaıda tastap ketse, ekstra-taımda Aıbol Ábiken «qyzyl qaǵaz» alyp, alańnan qýyldy. Matchtyń sońǵy mınýttaryn toǵyz oıynshymen ótkizgen «Qaırat» 104-mınýtta qaqpasyna gol ótkizip aldy. Qorytyndy esep – 3:2. «Alashkert» – Eýropa lıgasynyń pleı-off kezeńinde.
«Qaırattyń» ishki chempıonatta da, Eýrokýbok básekelerinde de agressııalyq oıyn kórsetetini belgili. Osy bir oıyn júıesiniń saldarynan almatylyq ujym Eýrododa básekelerine qatysa-
tyn qazaqstandyq klýbtar arasynda eń dóreki komandanyń biri bolyp tur. Máselen, byltyrǵy el chempıondary búginge deıin Eýropa jasyl alańdarynda ótkizgen 44 matchta 13 fýtbolshysy «qyzyl qaǵazben» jazalanyp, alańnan qýylǵan.
Endi «Qaırat» Konferensııa lıgasynyń toptyq kezeńine túsý úshin pleı-off básekesinde Lıýksembýrgtiń «Fola» komandasymen oınaıdy. Al Qaraǵandynyń «Shahteri» pleı-offta Izraıldiń «Makkabı» (Tel-Avıv) klýbymen kezdesedi. Komandalardyń birinshi matchtary 19 tamyzǵa, qarymta oıyny 26 tamyzǵa josparlanǵan.
