Astana Open ATP 250 jarysy bıylǵy kásipqoı tennısshiler qaýymdastyǵynyń (ATP) jańartylǵan resmı kúntizbesine engizilgen. Qazaqstan tennıs federasııasynyń vıse-prezıdenti Iýrıı Polskııdiń aıtýynsha, ATP-dyń dırektorlar keńesi men byltyr elordada ótken jarysqa qatysqan oıynshylar Astana Open dodasynyń deńgeıin joǵary baǵalaǵan.
– Pandemııanyń qaıtadan keń taralýyna baılanysty bıyl kúzde Qytaıda kóptegen halyqaralyq jarys ótpeıtin boldy. Sóıtip, ATP basshylyǵy bizge sol týrnırlerdiń birin uıymdastyrýǵa ótinish bildirgen bolatyn. Biz óz tarapymyzdan olardyń usynysyn qabyl alyp, jarysty ótkizýge kelisim berdik. Bul – biz úshin jaqsy múmkindik, mundaı jarystar eń aldymen talantty jastarǵa jol ashady, – dedi Iý.Polskıı.
Sonymen qatar Astana Open jarysynan bir apta buryn Nur-Sultan qalasynda erler men áıelder arasynda Qazaqstan chempıonaty ótedi. Munda jeńimpaz atanǵan oıynshy Astana Open-niń negizgi týrnırine, júldegerleri irikteý saıystaryna joldama alady. Astana ashyq birinshiligine elimizdiń tájirıbeli tennısshileri – Aleksandr Býblık, Mıhaıl Kýkýshkın, Andreı Golýbev pen Aleksandr Nedovesov, sondaı-aq Dmıtrıı Popko, Tımofeı Skatov, Denıs Evseev jáne Beıbit Juqaev sekildi jas sportshylarymyz da el chempıonaty arqyly óz baǵyn synap kóredi.
Jarysty uıymdastyrýshylar bıylǵy básekege balalardy shekteýli kólemde kirgizýdi josparlap otyr. Olar barlyq sanıtarlyq talaptarǵa sáıkes áýeli PTR test tapsyrady. Sóıtip, ol balalar súıikti tennısshileriniń oıyndaryn óz kózimen kóre alady. Eresek jankúıerler kortqa jiberilmeıdi. Qazaqstan tennıs federasııasy barlyq matchtardy QTF saıty men Qazaqstan telearnalarynyń birinde tikeleı efırde kórsetýdi josparlap otyr.
Byltyr qarasha aıynda ótken birinshi ATP 250 Astana Open jarysynda aýstralııalyq Djon Mıllman top jarǵan bolatyn. Bul – onyń mansabyndaǵy ATP týryndaǵy tuńǵysh júldesi. D.Mıllman fınalda fransııalyq sportshy Adrıan Mannarınodan 7:5, 6:1 esebimen basym túsken edi. Osy jeńistiń arqasynda Mıllman 2020 jyly ATR týrnıriniń júldelerin utyp alǵan elıtalyq chempıondar tizimine endi. Bul tizimde sondaı-aq Irjı Veselyı (Pýna), Reılı Opelka (Delreı Bıch), Novak Djokovıch (Dýbaı) jáne Ýgo Ýmber (Antverpen) bar.
Aıta keteıik, ATR 250 álemdik týryna jylyna 40 kásibı erler jarysy kiredi. Nur-Sultandaǵy týrnır jeńimpazy ATR reıtınginde 250 upaı enshileýge múmkindik alady.
