Jasóspirimderdiń aıaq alysy jaman emes
Bıylǵy jastar men jasóspirimder arasyndaǵy bokstan Azııa chempıonatynda (ASBC) qurlyq birinshiliginde 51 jańa jeńimpazdyń esimi anyqtaldy (25 qyz ben 26 ul). Bul – salmaq dárejeleriniń sany boıynsha rekordtyq kórsetkish. Sary qurlyq birinshiligine eń kóp boksshy Qazaqstan, О́zbekstan jáne Úndistan quramalarynan qatysty.
Bıylǵy birinshiliktiń taǵy bir ereksheligi, tarıhta birinshi ret bir chempıonatta eki býynnyń (jas ereksheligine qaraı) ókilderi sharshy alańǵa shyqty. Atap aıtqanda, 2003 pen 2004 jyly týǵandar jastar arasynda baq synasa, 2005-2006 jyly týǵan boksshylar jasóspirimder arasynda kim myqtyny anyqtady.
Fınaldyq jekpe-jekterdi aldymen Arkadıı Topaev baptaıtyn jasóspirimder quramasy bastap berdi. Bul synda Qazaqstan quramasynyń jeti ókili fınalǵa shyǵyp, onyń tórteýi Azııa chempıonatynda atoı saldy. Atap aıtar bolsaq, barlyq qarsylasynan basym túsken Damır Baıpaqov (46 kg), Tórehan Sabyrhan (52 kg), Adaıbek Nııazbaev (54 kg) jáne Baqtııar Anarbaev (57 kg) tuǵyrdyń eń bıik satysynan kórindi. Al fınalda qarsylastaryna ese jibergen Islam Sovetov (66 kg), Mohammed Attııa-Hamed (81 kg), Erdos Sháripbek (+ 81 kg) kúmis júldeni moıyndaryna taqty. Azııa birinshiliginiń jartylaı fınalynda jeńilgen Aıdar Qadirhan (48 kg), Ilıa Kalının (50 kg), Madııar Taıpaqov (60 kg), Vıktor Lıtvınov (70 kg) pen Dáýlet Tólemisov (75 kg) chempıonatty qola júldemen qorytyndylady.
Osylaısha, Qazaqstannyń jasóspirimder quramasy Birikken Arab Ámirlikterinde 4 altyn, 3 kúmis jáne 5 qola medal jeńip aldy. Osy nátıjemen olar jalpykomandalyq esepte ekinshi oryndy ıelendi. Aldymyzda – О́zbekstan boksshylary. Olar 6 altyn medal oljalady.
Sonymen qatar Eldos Saıdalın jetekshilik etetin qyzdar arasyndaǵy jasóspirim boksshylar da jalpy esepte ekinshi orynǵa qol jetkizdi. Jerlesterimiz el qorjynyna 4 altyn, 6 kúmis jáne 3 qola júlde saldy. 6 altyn, 4 kúmis medal jeńip alǵan úndistandyq qyzdar Azııa birinshiligin birinshi orynmen aıaqtady. Al О́zbekstan quramasynyń boksshylary 3 altyn jáne 3 kúmis júldege qol jetkizdi.
Qazaqstan quramasy sapynan Vıktorııa Baıdýkova (54 kg), Uljan Sársenbek (57 kg), Arýjan Jańabaeva (66 kg) jáne Úmit Ábilqaıyr (81 kg) Kók týymyzdy kókte jelbiretse, Eńlik Bostybaeva (50 kg), Tomırıs Myrzaqul (52 kg), Ásem Tańatar (60 kg), Áıgerim Qabdolda (63 kg), Ajar Túrkistanova (75 kg), Shuǵyla Rysbek (+ 81 kg) – kúmis, Elıanur Turǵanova (46 kg), Anıta Adısheva (48 kg) jáne Baqyt Seıdısh (70 kg) qola medal ıelendi.
Jastarymyz – Azııada aldyńǵy qatarda
Sáýir aıynda Polshanyń Kelse qalasynda ótken bokstan jastar arasyndaǵy álem birinshiliginde 2 altyn, 2 kúmis jáne 1 qola medalmen jalpykomandalyq esepte ekinshi orynǵa taban tiregen Qazaqstannyń jastar quramasy Azııa chempıonatynda da ózderiniń myqtylyǵyn dáleldedi.
Asa jeńil salmaqta Kelsede álem chempıony atanǵan Sanjar Táshkenbaı Dýbaıda da jeńis tuǵyrynyń eń bıik satysynan kórindi. Fınalda úndistandyq Vıshvanat Sýrıshti 5:0 esebimen jeńip, Azııa chempıony atandy. Túrkistan oblysynyń týmasy osylaısha bir jyl ishinde álem birinshiliginde de, Azııa chempıonatynda da top jardy. Al álem birinshiliginde kúmis júlde enshilegen Elnur Súıinbaı (63,5 kg) Birikken Arab Ámirlikterinde sary qurlyqtyń altyn medalin moınyna taqty. Sonymen qatar Nursultan Altynbek (54 kg), Ábdiǵáli Ábdikerim (57 kg), Erasyl Ermek (60 kg), Abzal Serik (67 kg), Baqbergen Álıasqarov (75 kg) jáne Temirlan Muqataev (86 kg) Azııada teńdessiz dep tanyldy.
О́kinishke qaraı, fınaldyq aıqasta qarsylastaryna jol bergen aýyr salmaqtaǵy Mádı Ámirov (92 kg) pen asa aýyr salmaqtaǵy Danııal Saparbaı (+ 92 kg) kúmis medaldy qanaǵat tutty. Eki jerlesimiz de fınalda ózbekstandyq qarsylastarynan jeńildi. M.Ámirov Nýsratbek Tohırovtan basym daýyspen (2:3), D.Saparbaı tóreshilerdiń bir aýyz sheshimimen (0:5) Jahongır Zokırovtan utyldy. Al jartylaı fınalda qarsylastaryna jol bergen Arman Almatuly (71 kg) men Dáýren Mamyr (82 kg) Azııa birinshiliginiń qola júldegeri atandy.
Osylaısha, Qaırat Sátjanov jetekshilik etetin Qazaqstannyń jastar quramasy Dýbaıdaǵy dodany 8 altyn, 2 kúmis jáne 2 qola medalmen qorytyndylady. Osy nátıjemen jalpykomandalyq esepte kósh basyna shyqty. 3 altyn, 3 kúmis jáne 1 qola medal jeńip alǵan О́zbekstan jastar quramasy ekinshi orynǵa taban tirese, úzdik úshtikti Úndistan boksshylary túıindedi. Olar 2 altyn, 3 kúmis, 4 qola medal oljalady.
Taǵy bir aıta keterligi, Elnur Súıinbaı jastar arasyndaǵy Azııa chempıonatynyń eń úzdik boksshysy degen ataqqa ıe boldy.
Eldos Saıdalın jattyqtyratyn jastar arasyndaǵy Qazaqstan qyzdar quramasy da barlyq salmaq dárejesi boıynsha baq synady. Fınaldyq saıysta judyryqtasqan Mılana Aıýpova (63 kg), Aıda Sarybarova (81 kg) jáne Dıana Magaýıaeva qarsylastarynan basym túsip altynnan alqa taqsa, fınalda súringen Aıshagúl Eleýbaeva (54 kg), Juldyz Shaıahmetova (60 kg), Gaýhar Shaıbekova (70 kg) men Dana Dıdaı (75 kg) kúmiske qol jetkizdi. Al Gúlnaz Bóribaeva (48 kg), Gúlnar Turapbaı (52 kg) jáne Shahnaz Isaeva (57 kg), qola medaldy qanaǵat tutty.
Jalpykomandalyq esepte О́zbekstan quramasy aldyna jan salmady. Olar 5 altyndy oljalap, úzdikter qatarynan kórindi. Ekinshi oryndaǵy Úndistan qorjynynda 4 altyn bar. Qazaqstan quramasy úsh altynmen úshinshi satyǵa jaıǵasty.
SÝRETTE: chempıonattyń
«Eń úzdik boksshysy» atanǵan
Elnur SÚIINBAI
