Is-sharaǵa Qazaqstannyń saıası jáne qoǵam qaıratkerleri, Qazaqstanda akkredıttelgen dıplomatııalyq korpýs pen halyqaralyq uıymdardyń ókilderi, sarapshylar men joǵary oqý oryndarynyń stýdentteri qatysty.
Synaq polıgony jabylýynyń mereıtoıymen qatar, is-shara Ortalyq Azııada ıadrolyq qarýdan azat aımaq týraly shartqa (OAIаQAASh) qol qoıylýynyń 15 jyldyǵyna arnaldy.
BUU Turaqty úılestirýshisi Mıkaela Frıberg-Storı óziniń sózinde Qazaqstannyń ıadrolyq qarýsyzdaný men taratpaý salasyndaǵy mańyzdy rólin atap ótip, Semeı polıgonynyń jabylýy jahandyq antııadrolyq qozǵalystyń damýynyń mańyzdy kezeńi jáne Qazaqstan ıadrolyq qarýdy taratpaýda kópshilikke úlgi bolǵanyn atap ótti.
QR Syrtqy ister mınıstrligi Halyqaralyq qaýipsizdik departamentiniń dırektory Qaırat Sarjanov táýelsizdiktiń tańynda Semeı polıgony jabylýynyń úlken saıası mańyzdylyǵyn atap ótti jáne elimizdiń aımaqtyq jáne jahandyq aýqymda beıbitshilik pen qaýipsizdikti qamtamasyz etýge baǵyttalǵan birqatar bastamalaryna toqtaldy.
«BUU Bas Assambleıasynyń sessııasynda sóılegen sózinde Qazaqstan Prezıdenti Qasym-Jomart Toqaev ıadrolyq qarýdan azat álemge qol jetkizý Qazaqstan úshin basty basymdyq bolyp qala berdi jáne ıadrolyq qarýdy joıý jolyndaǵy jahandyq qozǵalystyń aldyńǵy shebinde bolýǵa moraldyq quqyq bere otyryp, qazaq halqynyń jalpyulttyq birtektiginiń ajyramas bóligine aınaldy», dedi dıplomat.
Burynǵy Syrtqy ister mınıstri Aqmaral Arystanbekova óz sózinde Qazaqstan Respýblıkasynyń Tuńǵysh Prezıdenti N.Nazarbaevtyń Jarlyǵymen Semeı ıadrolyq polıgonyn japqan Qazaqstannyń tarıhı úlesi, keıin IаQTSh-ǵa ıadrolyq emes memleket retinde qosylýy jáne ıadrolyq qarýdan óz erkimen bas tartýy týraly aıtyp, Qazaqstannyń BUU-daǵy tuńǵysh Turaqty ókili retinde ol jyldar boıy álem qaýymdastyǵynyń jańa táýelsiz memleketimizge kórsetilgen laıyqty qurmet pen senimine kýáger bolǵanyn málimdeli.
Memleket jáne qoǵam qaıratkeri, dıplomat Oljas Súleımenovtiń álemdegi birinshi ıadrolyq qarýǵa qarsy «Nevada-Semeı» qozǵalysynyń qurylý tarıhy týraly sózderi jıynǵa qatysýshylardyń úlken qyzyǵýshylyǵyn týdyrdy.
Dóńgelek ústel aıasynda qatysýshylarǵa Semeı polıgonyndaǵy ıadrolyq synaqtardyń zardaptaryna arnalǵan taqyryptyq beınerolık kórsetildi.
