BUU halyqaralyq qoǵamdastyqtan «Talıban» bıligine tizginin bergen Aýǵanstandy qoldaýǵa shaqyrdy. Uıymnyń aıtýynsha, qazir elde azyq-túlik, dári-dármek, taza sý tapshy. Sol sebepti shuǵyl áreket etý kerek delingen habarlamada. Bul 600 mıllıon dollar mıllıondaǵan adamnyń ómirine qajetti kómekti usyna alady deıdi uıym ókilderi.
«El óte kúrdeli jaǵdaıǵa tap boldy. Uzaqqa sozylǵan qaqtyǵys, jappaı qurǵaqshylyq pen COVID-19 jaǵdaıdy ýshyqtyrdy... Buǵan deıin de halyqtyń jartysyna jýyǵy kómekke muqtaj edi», delingen BUU habarlamasynda.
Sondaı-aq sońǵy oqıǵalar jyǵylǵanǵa judyryq bolǵandaı, qarapaıym halyq qyspaqqa alynǵan. Qolma-qol aqshanyń jetispeýshiliginen ekonomıka tyǵyryqqa tirelgen. Odan bólek áıelder men qyzdardyń quqyqtary týraly alańdaýshylyq kún sanap artyp keledi. Sol sebepti uıym halyqaralyq qoǵamdastyqtyń jedel áreketi men qoldaýy óte mańyzdy dep eskertti.
Talıbandar tamyz aıynda Aýǵanstan bıligin óz qolyna alǵanǵa deıin de eldegi soǵys pen beı-bereketke baılanysty bıyl 550 myńnan astam adam úılerin tastap ketýge májbúr bolǵan. Bul qazirgi ýaqyttyń ózinde 3,5 mıllıon adam el ishinde kóship-qonyp júrgenin bildiredi.
Jınalatyn qarajattyń úshten bir bóligi BUU-nyń Dúnıejúzilik azyq-túlik baǵdarlamasyna (UQJ) berilmek, óıtkeni eldegi azyq-túliktiń jetispeýshiligi ózekti bolyp tur. Halyqta kúndelikti tamaǵyn satyp alatyn qolma-qol aqsha joq.
Sonymen birge, BUU-nyń Bosqyndar isteri jónindegi joǵarǵy komıssary Fılıppo Grandı dúısenbide Kabýlǵa halyqtyń gýmanıtarlyq qajettilikterin jáne 3,5 mıllıon jer aýdarǵan aýǵandyqtyń jaǵdaıyn baǵalaý úshin elge kelgenin habarlady.
«Talıban» qozǵalysy az ýaqyttyń ishinde el bıligin baqylaýǵa alǵannan beri myńdaǵan adam barynsha elden qashýǵa tyrysqanyna dúnıe júzi kýá. Pákistannyń halyqaralyq áýekompanııasy jolaýshylardy Islamabadqa jetkizý úshin el astanasyna arnaıy reıs jibergen.
Sarapshylar Batystan qoldaý tapqan Aýǵanstan úkimeti qulaǵannan keıin jáne «Talıbannyń» jeńisinen soń mıllıardtaǵan dollarlyq sheteldik qaıyrymdylyqtyń kúrt úzilýi BUU-nyń qyzmetine de aýyrtpalyq túsireıin dep turǵanyn aıtady.
Onyń ústine Reuters jaqynda BUU Bas hatshysy Antonıý Gýterrıshtiń jýrnalısterge uıymnyń qarjylyq qıyndyqtarǵa tap bolǵanyn aıtqanyn jarııalaǵan. Ol «qazirgi ýaqytta BUU óz qyzmetkerlerine jalaqy tóleı almaıdy», degen.
Aýǵanstanmen shekaralas Qytaı 31 mıllıon dollar kóleminde tótenshe kómek usynatynyn málimdedi. Onyń ishinde azyq-túlik pen koronavırýsqa qarsy vaksına bar. Bul kómek Beıjiń «Talıban» úkimetimen baılanys ornatýǵa daıyn ekenin aıtqannan keıin beriletini belgili boldy. Qytaıdyń Syrtqy ister mınıstri Van I ótken aptada Aýǵanstanmen kórshiles birneshe eldiń – Pákistan, Iran, Tájikstan, О́zbekstan jáne Túrikmenstandaǵy áriptesterimen kezdesýde Aýǵanstanǵa kómek kórsetý sharalary týraly jarııalady. Ol bul elderdi Aýǵanstanǵa kómek kórsetýde yntymaqtasýǵa shaqyrdy jáne Qytaı sonymen birge elge 3 mıllıon vaksına dozasyn bermek. «Talıban» qozǵalysynyń resmı ókilderi de Qytaıdy Aýǵanstannyń eń mańyzdy seriktesi dep tanyǵanǵa uqsaıdy. Soǵystan kúıregen eldi qalpyna keltirýge Qytaı ınvestısııasy men qoldaýyna úmit artatyny belgili boldy.
Reseı tarapy da gýmanıtarlyq kómek kórsetý máselesi qaralyp jatqanyn habarlady.
Qazir dúnıejúzilik uıymdardyń nazary Aýǵanstandaǵy gýmanıtarlyq daǵdarysqa aýyp otyr. Sol sebepti halyqaralyq uıym ózge elderden bul máselede jumyla áreket etýdi suraýda.
