Is-sharaǵa qatysýshylar pandemııamen kúres, densaýlyq, qaýipsizdik, yntymaqtastyq jáne basqa da baǵyttar boıynsha óz oılaryn bildirip, usynys-pikirlerimen bólisken.
«Biz qatysqan plenarlyq sessııa Qazaqstan Táýelsizdiginiń 30 jyldyǵyna arnaldy. Osy jyldar ishinde Qazaqstan egemen el retinde tolyq qalyptasyp, aıtarlyqtaı jetistikterge qol jetkizdi. Shyn máninde, biz bar bolǵany úsh onjyldyqta ordaly elge aınaldyq. Shekaramyzdy shegendep, ekonomıka men ishki jáne syrtqy saıasatta jasampaz sheshimder qabyldadyq. Táýelsiz memleket qurý jolynda salıqaly qadamdar jasadyq. Árıne, áli de bolsa jetildiretin, tolyqtyratyn tustarymyz bar ekeni belgili. Aldaǵy ýaqytta sonyń bárin eńserip, eldigimizdi eńseli ete túsemiz dep senemin. Oǵan bizdiń áleýetimiz de, múmkindigimiz de tolyq jetedi», dedi M. Áshimbaev.
Sondaı-aq ol Qazaqstannyń búkil álemmen ashyq qarym-qatynas ornatyp kele jatqanyn jetkizdi.
«Qazirgi tańda biz úshin Táýelsizdikten asqan qundylyq joq. Sondyqtan egemendikti odan ári nyǵaıtý – barsha qazaqstandyqtyń abyroıly mindeti. Osy jolda ashyqtyq pen toleranttylyq asa mańyzdy. Sol sebepti Qazaqstan táýelsizdiktiń alǵashqy kúninen bastap búkil álemmen ashyq qarym-qatynas ornatyp, ınnovasııaǵa, ǵylym men bilimge jáne ózara yntymaqtastyqqa basa mán berip keledi», dedi Senat tóraǵasy.
Máýlen Áshimbaev qazaq eliniń álemge jahandyq máselelerdi talqylaıtyn osyndaı alań usynýynyń ózi ashyqtyqtyń jarqyn úlgisi dep sanaıdy.
«Bıyl is-shara onlaın formatty qoldanyp ótkizilgenine qaramastan, ádettegideı álemge belgili ári bilikti spıkerler men sarapshylar jumyldyrylǵan. Soǵan baılanysty kóptegen ózekti máseleniń sheshimin tabý úshin osyndaı jıyndardyń bereri mol dep esepteımin», dep jazylǵan Senat tórǵasynyń feısbýktegi jazbasynda.
