QR Bilim jáne ǵylym mınıstrligi Til saıasaty komıtetiniń bastamasymen ótken baıqaýdyń maqsaty - Ahmet Baıtursynulynyń ǵylymı-pedagogıkalyq muralarymen sabaqtastyqty jalǵastyra otyryp, memlekettik tildi sapaly oqytý maqsatyn júzege asyryp júrgen úzdik oqytýshylardyń jańashyl ádis-tásilderimen tanysý, ozyq tájirıbelerin taratý, qazaq tili oqytýshylarynyń kásibı bedeli men qoǵamdaǵy mártebesin arttyrý.
«Ult ustazy Ahmet Baıtursynulynyń til úıretýdegi óshpes muralaryn jalǵastyrý - paryzymyz. Sapaly oqytý degenimiz, saıyp kelgende, uly ǵalym ıdeıalary men til úıretýdegi ádis-tásilderin úılesimdi qoldanýǵa ákep saıady. Bul shara óńirlerde memlekettik tildi oqytýmen aınalysyp júrgen ádisker mamandar men oqytýshylardyń ózara tájirıbe almasyp, ádistemelik biliktilikterin shyńdap, ozyq tájirıbelerdi keńinen taratýdy kózdeıdi», dedi Til saıasaty komıtetiniń basqarma basshysy Aınagúl Kókenova.
Baıqaý nátıjesi boıynsha elimizdiń 15 óńirindegi Tilderdi oqytý ortalyqtarynyń qatysýshylary tómendegideı nátıjege qol jetkizdi:
Bas júldeni tildi úıretýde ınnovasııalyq ozyq ádis-tásilderdi qoldaný, sabaqty onlaın/oflaın formatta sheber júrgizý, 5 deńgeı boıynsha til úıretýdiń qyr-syryn meńgergen Qaraǵandy oblysy Saran qalasynyń tilderdi damytý ortalyǵynyń oqytýshysy Dınara Jýpenova ıelendi;
Sonda-aq birinshi orynǵa Almaty oblysy «Til» oqý-ádistemelik ortalyǵy Panfılov aýdandyq fılıalynyń meńgerýshisi Asylan Qalıbekov;
Ekinshi orynǵa Soltústik Qazaqstan oblysy ákimdiginiń Mádenıet, tilderdi damytý jáne arhıv isi basqarmasynyń Tilderdi oqytý ortalyǵynyń oqytýshysy Ásel Mahmetova jáne Qyzylorda oblysynyń ishki saıasat basqarmasy Tilderdi oqytý ortalyǵynyń oqytýshysy Balaýsa Tórebaı laıyq dep tanyldy.
Úshinshi oryndy Shyǵys Qazaqstan halqynyń tilderi men mádenıetin túletý mektebiniń muǵalimi Toǵjan Aıtqazına, Shymkent qalalyq Tilderdi oqytý-ádistemelik ortalyǵynyń oqytýshysy Aqbaıan Asylbekova jáne Jambyl oblysy ákimdiginiń tilderdi damytý basqarmasy Tilderdi oqytý ortalyǵynyń oqytýshysy Aıgúl Bohshıevaıelendi.
Memlekettik tildi oqytý ádistemesin jetildirý baǵytyndaǵy sharalar aldaǵy ýaqytta da jalǵasyn tabady.
Aıta ketý kerek, qazaq tilin oqytý ádistemesin jetildirý baǵytyndaǵy sharalar kesheni turaqty júzege asyrylýda. Máselen Til saıasaty komıtetiniń tapsyrysymen shyqqan «Tilqural.kz», «Tilmedia.kz», «Balatili.kz», «Avai.institute» portaldarynan ózge, Jambyl oblysy tilderdi damytý basqarmasy ázirlegen «Qazonline» mobıldi qosymshasy, Pavlodar oblysynyń «Ana tili» ortalyǵy ázirlegen «Ana tili» mobıldi qosymshalary qazaq tilin úırenýge talpynyp júrgen azamattardyń joǵary suranysyna ıe.
