Qujatqa sáıkes, COVID-19 rastalǵan jaǵdaıynyń jaqyn baılanysy bylaı anyqtalady:
- COVID-19 jaǵdaıymen bir turǵyn úıde birge turatyn adam;
- COVID-19-ben aýyratyn naýqaspen nemese COVID-19 jaǵdaıynyń ınfeksııalyq bólindilerimen qorǵalmaǵan tikeleı baılanysta bolǵan adam (mysaly, jótelý, qol alysý kezinde jáne t.b.);
- JQQ (qorǵanysh maskasyn) paıdalanbaı jabyq úı-jaıda (mysaly, synypta, keńeske arnalǵan bólmede, aýrýhanadaǵy kútý bólmesinde jáne t. b.) COVID-19 jaǵdaıymen birge 15 mınýt nemese odan kóp ýaqyt ishinde 1,5 metrden kem qashyqtyqta bolǵan adam;
- COVID-19 jaǵdaıyna tikeleı kútimdi qamtamasyz etetin medısına qyzmetkeri nemese basqa da adam nemese usynylǵan JQQ-syz ne JQQ-ny qoldanýdy buzý múmkindigimen COVID-19 jaǵdaıynyń bıoúlgilerimen jumys istegen zerthana mamandary;
- ushaqta, qalaaralyq qatynastaǵy avtobýsta, poezda, COVID-19-ben aýyratyn naýqastan kez kelgen baǵytta eki oryndyq qashyqtyqta bolǵan baılanysta bolǵan adam, sondaı-aq COVID-19-ben aýyratyn naýqas ushqan ushaqtyń seksııasyna qyzmet kórsetken ekıpaj músheleri retinde aıqyndalady.
Jaqyn baılanysta bolǵandardy anyqtaý úshin epıdemıologııalyq baılanystardy tergep-tekserý kezeńi COVID-19 jaǵdaıy anyqtalǵanǵa deıin 14 táýlik buryn bastalýy jáne COVID-19 jaǵdaıyn oqshaýlaý sátimen aıaqtalýy tıis.
Sondaıaq COVID-19-ben aýyratyn naýqaspen baılanysta bolǵan adamdarǵa qatysty sharalar (jaqyn baılanys) jarııalandy:
1) COVID-19-ǵa qarsy vaksınasııanyń tolyq kýrsyn alǵany týraly qujattamalyq rastaý bolmaǵan kezde COVID-19-ben aýyratyn naýqaspen baılanysta bolǵan adamdar (jaqyn baılanys) 14 kúnge úıde oqshaýlaýǵa (úı karantıni) jatady. Oqshaýlaýdyń 3-shi kúni PTR ádisimen COVID-19-ǵa baılanysta bolǵan adamdy (jaqyn baılanys) zerthanalyq tekserý úshin synama alý júrgiziledi. PTR zertteý teris bolǵan jaǵdaıda MSAK mamany kún saıyn 14 kún boıy telefon arqyly baılanysta bolǵan adamnan onyń densaýlyq jaǵdaıyn (dene temperatýrasy, aýrý belgileriniń bolýy) naqtylaıdy, 14 kún ótkennen keıin COVID-19 belgileri bolmaǵan jaǵdaıda karantın men oqshaýlaý aıaqtalady. PTR-zertteýdiń oń nátıjesi bolǵan kezde MSAK mamany Sanıtarııalyq-epıdemıologııalyq komıtettiń aýmaqtyq bólimshesine COVID-19-ben aýyratyn naýqasqa jedel habarlama beredi.
2) COVID-19-ǵa qarsy vaksınasııalaýdyń tolyq kýrsyn alǵany týraly qujattamalyq rastaý bolǵan kezde COVID-19-ben aýyratyn naýqaspen baılanysta bolǵan adamdar (jaqyn baılanys) MSAK mamanynyń medısınalyq tekserýine jatady. COVID-19 belgileri bolmaǵan kezde baılanysta bolǵan adamdar úı karantınine oqshaýlanbaıdy, COVID-19-ǵa zerthanalyq tekserý júrgizilmeıdi, MSAK mamany kún saıyn 14 kún boıy telefon arqyly baılanysta bolǵan adamnan onyń densaýlyq jaǵdaıyn (dene temperatýrasy, aýrý belgileriniń bolýy) naqtylaıdy. Aýrýdyń belgileri paıda bolǵan kezde baılanysta bolǵan adam PTR-test nátıjelerin alǵanǵa deıin PTR ádisimen COVID-19-ǵa zerthanalyq tekserýge jáne úıde oqshaýlaýǵa (úı karantıni) jatady. COVID-19 dıagnozy rastalǵan kezde MSAK mamany Sanıtarııalyq-epıdemıologııalyq baqylaý komıtetiniń aýmaqtyq bólimshesine COVID-19-ben aýyratyn naýqasqa shuǵyl habarlama beredi.
- Sımptomsyz vırýs tasymaldaýshylyq kezinde pasıent ambýlatorııalyq jaǵdaıda medısınalyq baqylaýǵa jáne osy qaýlyǵa 36-qosymshaǵa sáıkes oqshaýlaý jaǵdaılary bolǵan kezde COVID-19-ben aýyratyn naýqaspen sońǵy baılanysta bolǵan sátten bastap 14 kúnge úıde oqshaýlaýǵa (úı karantıni) jatady. Bekitilgen algorıtmge sáıkes táýekel faktorlary bolǵan jáne úıde oqshaýlaý úshin jaǵdaılar bolmaǵan kezde emdeýge jatqyzý týraly sheshimdi MSAK mamany árbir jaǵdaıda jeke qabyldaıdy.
Ýchaskelik terapevt kún saıyn koronavırýstyq ınfeksııanyń klınıkalyq sımptomdarynyń bolýyna úı karantınindegi sımptomsyz vırýs tasymaldaýshyǵa qońyraý shalýǵa mindetti. COVID-19-ben aýyratyn naýqaspen sońǵy baılanysta bolǵan sátten bastap 14 kún ishinde klınıkalyq sımptomdar bolmaǵan jaǵdaıda karantın aıaqtalady. Karantın aıaqtalǵan kezde MSAK mamany sımptomsyz vırýs tasymaldaýshyǵa COVID-19 profılaktıka sharalaryn saqtaý qajettiligi týraly usynymdar beredi (medısınalyq maskany, antıseptıkterdi paıdalaný, qol gıgıenasy, áleýmettik qashyqtyq), delingen qujatta.
Úı karantınindegi sımptomsyz vırýs tasymaldaýshyda aýrýdyń klınıkalyq belgileri paıda bolǵan kezde (dene temperatýrasynyń 38 gradýsqa deıin jáne odan joǵary kóterilýi, tamaqtyń jybyrlaýy jáne/nemese aýyrýy, álsizdik, jótel, bas aýyrýy, entigý, tynys alýdyń qıyndaýy jáne koronavırýstyq ınfeksııanyń basqa da sımptomdary) ýchaskelik terapevt Sanıtarııalyq-epıdemıologııalyq baqylaý komıtetiniń aýmaqtyq bólimshesine COVID-19-ben aýyratyn naýqasqa jedel habarlama beredi.
Jedel habarlama kelip túsken Sanıtarııalyq-epıdemıologııalyq baqylaý komıtetiniń aýmaqtyq bólimshesi osy COVID-19-ben aýyratyn naýqasty tirkeýdi jáne esepke alýdy júzege asyrady, ony sımptomsyz vırýs tasymaldaýshylardyń esebinen alyp tastaıdy, sondaı-aq sımptomsyz vırýs tasymaldaýshylyq jaǵdaılarynyń manıfestik nysandarǵa (sımptomdary bar jaǵdaılar) aýysýynyń jeke statıstıkasyn júrgizedi.
Odan bólek COVID-19-ben aýyratyn naýqaspen baılanysta bolǵan adamnyń jáne shetelden Qazaqstan Respýblıkasyna avıareıstermen kelgen adamdarǵa qatysty qoldanylatyn sharalar da qujatta anyq kórsetilgen.
