Elızabet ınstagramdaǵy óz akkaýntynda: «Qurmetti jankúıerler, kásibı sportshy retinde men óz kareramdy aıaqtadym. Osyndaı sheshim qabyldaý maǵan ońaı bolǵan joq. О́zderińiz bilesizder, uzaq ýaqyt boıy arqamnan alǵan jaraqat qatty mazalady. О́kinishke qaraı, sol syrqattan tolyqtaı aıyǵa almadym. Sonyń saldarynan tolyqqandy jattyǵýlar jasaý múmkin bolmady. Qazirgi kezde men Qazaqstandamyn. Jyldyń sońyna deıin elde bolyp, osy sport túrin tańdaǵan balalarǵa kómektesip, tájirıbemmen bólisemin. Qazaqstanda mánerlep syrǵanaýdy damytsam dep men únemi armandaıtynmyn. Mine, endi sondaı múmkindik týyndap otyr» – deı kele, óziniń ata-anasy men bapkerlerine, qoldaý kórsetken azamattar men jankúıerlerge, Mádenıet jáne sport mııstriligi men Ulttyq Olımpıada komıtetine jáne Qyzylorda oblysynyń ákimshiligine zor alǵysyn bildirdi.
Sporttyq manasbyn Máskeýde bastap, birer jyl Kanadada sheberligin shyndaǵan Elızabettiń el sportyna sińirgen eńbegi orasan zor ekeni esh daý týǵyzbaıdy. Ár jyldary Irına Strahova, Aleksandr Shýbın, Natalıa Dýbınskaıa, Svetlana Sokolovskaıa, Elena Býıanova, Braıan Orser, Eterı Týtberıdze jáne Sergeı Dýdakov syndy maıtalman mamandardyń qol astynda jattyqqan ol muz aıdynda jasyndaı jarqyrady. Eń eleýli tabystaryna toqtalatyn bolsaq, 2016 jyly Norvegııanyń Hamar qalasynda ótken jasóspirimderdiń Dúnıejúzilik Olımpıadasynda qola medal ıelendi. 2017 jyly Sapporodaǵy Azııa oıyndarynda da dál sol mejeden kórindi. 2018 jyly Phenchhanda alaýy tutanǵan Olımpııa oıyndaryna qatysyp, 12-orynǵa taban tiredi. 2019 jyly Tórt qurlyqtyń chempıonaty men Dúnıejúzilik Ýnıversıadada kúmis júldeni oljalady. Basqa da tolyp jatqan tabystary taǵy bar. Jalpy, respýblıkalyq jáne halyqaralyq jarystardy qosa alǵanda, qazaqtyń qarshyǵadaı qyzy barlyǵy 39 medalǵa ıelik etken eken.
Elızabet Tursynbaevanyń sporttyq ǵumyryndaǵy eń keremet kórsetkishi – álem chempıonatynyń kúmis medali ekeni sózsiz. Áli esimizde, Japonııanyń Saıtama qalasynda ótken jarystyń qysqa baǵdarlamasynda ol Lıýdvıg van Bethovenniń «Aı sonatasyn» minsiz oryndap, úshinshi oryndy enshiledi. Kelesi kúni erkin baǵdarlamada baq synady. Bul joly da Tursynbaeva tamasha óner kórsetti. Argentınalyq Astor Pıasollanyń «Býenos-Aırestegi jyl mezgilderin» asqan sheberlikpen oryndaǵan ol álem chempıonatynyń kúmis júldegeri atandy. Bizdiń arý tek Reseıdiń áıgili mánerlep syrǵanaýshysy, Olımpıada jáne Eýropa chempıony, tatar qyzy Alına Zagıtovadan ǵana qalyp qoıdy. Al eki dúrkin álem jáne Eýropa chempıony, Olımpııa oıyndarynyń kúmis júldegeri Evgenııa Medvedevanyń qola medaldi qanaǵat tutýdan basqa amaly qalmady. Osy oraıda, eki birdeı tarıhı sátke aıyryqsha toqtala ketken jón. Birinshisi, Elızabet áıelder arasyndaǵy dúnıejúzilik dodada «Salhov tórtigin» oryndaǵan tuńǵysh sportshy. Ekinshisi, Tursynbaevanyń esimi sporttyq shejirede álem chempıonatynda júlde alǵan qazaqtyń tuńǵysh mánerlep syrǵanaýshysy retinde altyn áriptermen jazyldy.
Nesine jasyraıyq, Tursynbaevadan biz budan da zor nátıje kúttik. Aldaǵy álem chempıonattary men Olımpııa oıyndarynda tańdaı qaǵarlyqtaı tabystarǵa qol jetkizip, barsha jankúıerdi áli talaı ret qýanysh pen shattyqqa bóleıtinine esh kúmánimiz joq edi. Biraq eski jaraqaty jıi mazalaǵannan soń ol nebary 21 jasynda úlken sportpen qosh aıtysýǵa bel býdy. Endi biz qazaq qyzynyń bapkerlikke bet burǵanyn qalaımyz. Bul kásipte de onyń eline bereri kóp. El maqtaǵan Elızabet Qazaqstandaǵy mánerlep syrǵanaý dep atalatyn ádemilik pen ásemdikke, sulýlyq pen symbattylyqqa negizdelgen sport túrin jańa beleske kóteredi dep úmittenimiz.
